狗狗係人類好朋友，可惜因為種種原因，好多都市人都未能在家中養狗。日廠Takara Tomy去年推出的Hello! Zoomer電子狗就讓大家一嘗當狗主的滋味。時隔一年就有第二代推出，不但繼續識行識走，聲控指令仲大幅增加一倍，更加聰明，愈來愈似真狗！

腳掌是滾輪，並採用雙關節設計，動作靈活又像真！　$1,880

用miniUSB叉電，可是充電1小時先至能夠玩得30分鐘，續航力有待改善。

尾部設關節，會隨心情擺動。

雙眼內藏LED燈，可顯示「$$」、「XX」等表情符號。

附送語音指令卡，英日對照，十分細心。

全身上下都設有動作感應器，如在前方舉手，便可令它跟着你或望向你。

按一下頭部，待雙眼打出問號便能發出語音指令。

說句「Zoomer, go pee pee」，即會黃狗射尿動作，笑死人！

想佢扮死？講句「Zoomer, play dead」就得！簡單指令尚有趴低、散步及舉手等等。

變身比高犬

提起電子狗，第一時間諗起Sony AIBO，不過已經停產，現時智能狗界就由Zoomer接班。第二代Zoomer體形結構跟上代一樣，頸、腰、耳仔都有鉸位，並擁有摺疊關節及滾輪腳掌。只不過今次外觀就由黑白斑點狗，變成啡白色的比高犬（Beagle），感覺更似動物，電子味稍減。雙眼LED亦保留下來，能顯示出「^^」、「XX」或「$$」等圖案，「狗主」可隨圖案估計心情，如真狗一樣。

識聽90個詞語

比高犬是出名智商極高的小型犬隻，而第二代Zoomer也比上代聰明，基本指令由15個增至29個，識別日語及英語詞語更由45個增至90個，當中包括坐低、走近、趴低、睡覺、搖尾、站立、我愛你、望向我、跟着我、原地轉等等，最爆笑係可叫佢四腳朝天扮死，或提起後腿來個黃狗射尿，十分過癮！落Order一如上代般簡單，按一下頭部，待LED燈打出問號，便能發出指令；若果聽唔明雙眼會再打出問號，飛走說明書都識玩！

野性難馴考耐性

小記以往玩過第一代，基本上一落指令Zoomer就服從，容易上手但缺乏挑戰性。來到這一代，內置的狗隻性格模擬系統得以強化，初次「見面」已經野性難馴，十問九唔應之餘仲經常「暴走」，似足真狗見到陌生人一樣。然而，只要跟它不斷反覆練習，待一段時間就會慢慢服從，令成隻電子狗更有血有肉，同時亦有助培養主人耐性，畀到人養真狗感覺。特別一提，此代還新增了「秘密把戲模式」，能作出多款複雜反應，例如扮牛叫、數數字及顯示金魚眼等，玩法多變，狗主們慢慢發掘啦！

查詢︰3102 2783

文︰Gilbert　

攝︰Homan