早前Michael Jordan去咗上海，唔只同Tinker Hatfield大講波鞋經，仲成為李娜、劉翔，以及「黑人」陳建州夫婦嘅集郵對象，相信大家喺on.cc或本報嘅體育版都睇到，其實為咗迎接呢位籃球之神，以及慶祝Air Jordan 30周年，Jordan Brand仲有好多大動作，當中包括喺上海市黃浦區舉行咗「House of Flight」大型展覽，仲邀請咗另一位Michael—劉建文（Michael Lau）炮製咗一張大型油畫，即使球迷未能親歷其境，唔緊要，依家Show番畀你睇！

Michael Lau坦言自己係足球人，但係都對Jordan佩服到五體投地，甚至直言Jordan先係最偉大嘅運動員，無人能及。

Jordan遠道東來，正巧費達拿都喺上海打比賽，老友一場當然要聚一聚。

為Jordan影過多張沙龍嘅Walter Iooss（左），被譽為「體育界的桂冠詩人」。

多得Walter Iooss，用鏡頭將Jordan嘅種種英姿永遠記錄落嚟。

House of Flight吸引咗多位名人到場參觀，當中包括潮界教父藤原浩。

House of Flight已經喺本周二圓滿結束，去唔到嘅香港球迷唔使失望，聽聞10月尾、下月初，Jordan Brand就會喺香港有大動作，到時記住留意本報及on.cc嘅報道。

開創傳奇　AJ 1

關鍵突破　AJ 3

滿載光榮　AJ 6

滄海遺珠　Air Ship

AJ珍品Show

House of Flight可說是Michael Jordan與AJ嘅精華回顧展，進場之後，先入眼簾嘅係多張Jordan球員時代嘅大型沙龍，記錄咗Jordan喺球場上嘅熱血一面之餘，仲有球場外嘅至Chok造型，呢批相片統統出自攝影大師Walter Iooss嘅手筆，係Jordan Brand首次喺大中華區展出。重溫咗Jordan嘅當年風采後，輪到多對AJ珍藏再度勾起大家嘅集體回憶，當中包括開創傳奇嘅AJ 1、對AJ發展起咗關鍵性作用嘅AJ 3、滿載光榮與淚水嘅AJ 6，甚至Jordan喺AJ以外所着嘅Air Ship等等，唔少展出鞋款既有Jordan或Tinker Hatfield嘅簽名留念外，鞋身表面仲布滿歲月痕迹，加倍令球迷想當年。

最愛始終AJ 1

Jordan對籃球嘅熱情，以及對勝利嘅執着，激勵咗無數球迷，就趁Jordan Brand成立30周年，品牌邀請咗Michael Lau以「We are Jordan」為題，結合埋球迷於微博發表嘅#WeAreJORDAN#相片，創作出「Jordan本色之牆」油畫，喺今次嘅House of Flight舉行咗首展禮。據知球迷相片多不勝數，有邊啲可以雀屏中選，成為今次創作嘅一部分？Michael Lau解畫︰「我好鍾意佢哋嘅畫面唔只講Jordan，而係融入自己嘅生活再衍化出嚟，呢個Point緊要啲，唔好咁直述。」

Michael Lau嘅創作多元化，除咗多年前以Jordan為設計靈感嘅Gardener Figure，以及今次嘅畫作外，如果有機會設計AJ特別版，佢又想唔想先？他續說︰「Michael Lau Air Jordan啦，或者Michael Air Jordan Lau啦！我永遠都鍾意啲Classic嘢，做到嘅話，梗係想整AJ 1啦！我最鍾意都係AJ 1，真係好代表到Jordan，鞋款真係好襟睇，我好需要啲嘢好襟睇。但係你話點創作呢……暫時都未諗到，唔會轉顏色咁簡單，我鍾意做啲鞋能夠有趣啲，當係藝術品做，希望嚟緊日子會做到啦！」Jordan Brand收到啦！

開創傳奇　AJ 1

原本NBA有明文規定，所有球員只可以着全白色鞋款上場，於1984至85年度球季面世嘅AJ 1就夠膽反建制，用咗Chicago Bulls嘅紅黑雙色，為此Jordan以至Nike都要交罰款畀NBA，就算場場都要畀，波神與剔牌都唔肯就範，結果唔只成就AJ傳奇，亦都令Signature Shoe嘅文化流行起嚟。

關鍵突破　AJ 3

話說Jordan曾經有過跳槽嘅念頭，Nike於是搵嚟藉Air Max 1一炮而紅嘅Tinker Hatfield設計AJ 3，加入外露式Air之餘，Tinker Hatfield仲大膽剔走Swoosh商標，又以Jumpman Logo取代原有嘅AJ標誌，令Jordan回心轉意，唔只令AJ系列得以延續落去，設計思維仲得到大革新。

滿載光榮　AJ 6

天才橫溢嘅Jordan，苦拚咗六個球季，終於喺1991年初嘗NBA冠軍滋味，當時Jordan嘅專用鞋款就係AJ 6。喺眾多配色之中，最得民心嘅唔只有主場嘅白紅色，仲有呢款黑紅色版本，當年Jordan着住佢，喺季後賽最後階段嘅第五場做出「The Move」神技，時至今日依然令人津津樂道。

滄海遺珠　Air Ship

Jordan與歷代AJ寫下了無數豐功偉績，相信球迷早就耳熟能詳，不過你又知唔知道，Jordan曾經着過非AJ嘅鞋款上場？除咗喺1995年貪得意借咗Penny Hardaway嘅Air Flight One着咗一陣外，原來喺1984至85年度，即係Jordan首季打NBA嗰陣，除咗AJ 1，佢亦着過Air Ship上陣。

網址︰www.Jordan.com/30th

鳴謝：Nike HK

特派記者︰Dick