今年波鞋界，All White真係贏晒冇得輸，唔同品牌嘅白色Sneakers一旦上架，隨即被各路潮人秒殺，唔只復刻Model，就連新鞋款都唔例外，好似今年夏天嘅adidas全白色Energy Boost，依家仲畀你搵到又唔使捱炒價嘅話，當你贏！錯過咗又唔使灰心，正如拍拖一樣，話唔定有更好嘅Mr/Miss Right等緊你呢！比起Energy Boost檔次更高嘅Ultra Boost，亦都加入All White熱潮，將於本周五上架，機會嚟喇，飛雲，預早三日提醒你，今次咪再執輸了！

Ultra Boost
$1,499
（本周五上架，男女裝同價）

Ultra Boost
$1,499
（本周五上架，男女裝同價）

整個鞋面用上Primeknit織物結構，針對腳掌唔同位置對支撐度嘅不同要求，編織密度亦有所不同。

三間商標融入鞋側嘅TPU支撐組件之中，而且與鞋面統一為全白色設計。

鞋底中間藏有Torsion System，以此協調前、後掌嘅擺動，以免其中一方扭動過多引致受傷。

鞋踭嘅罩形穩定器都係全白色，留意中間採用凹形設計，令用家更易做出蹬直腳背嘅動作。

All White有幾Hit？早前Phoebe Philo出席花生騷時，就着住白色嘅Stan Smith身體力行。（inmylittlemind.com圖片）

天生至夾全白色

真係多得一班潮人唔少，好似CÉLINE嘅設計大師Phoebe Philo，唔只係潮界運動風嘅始祖，仲好鍾意襯白色Sneakers現身，試問大家又點可以唔跟？至於傳聞多時嘅白色Ultra Boost，就鐵定本周五喺尖沙咀漢口道及旺角豉油街嘅專門店上架。自今年初Ultra Boost開賣以來，已經出過好多配色版本，不過至好睇都係全白版本，原因唔只因為今年興All White，更大理由係Boost呢種革命性嘅中底物料，由2012年尾面世至今都堅持白色外觀，而Ultra Boost就用咗厚厚嘅全掌式Boost，如果連鞋面都變成全白色，仲唔係襯到絕？況且唔只Primeknit織物鞋面，就連鞋身中段兩側嘅TPU支撐組件，以至鞋帶及踭位嘅罩形穩定器亦如是，完完全全白雪雪，即使冬天仲未到，香港又唔會落雪，都令人Feel到濃厚嘅冬日色彩。

All Black同步開售

掉轉嚟講，如果你唔鍾意跟風，唔代表冇鞋好揀，因為同期亦有全黑色嘅Ultra Boost上架，鞋面由兩種深淺度嘅黑色紗線織成，鞋身其餘部分都係全黑色，唯獨全掌式Boost中底依然係白色，正正與鞋身形成鮮明對比。老老實實，今年興All White，但All Black嘅魅力係永恒不滅，而且比白色易襯衫得多，對黑色神秘感忠心不二嘅潮人，呢個禮拜五一樣都係破財難免。而且換轉角度講，之前大熱嘅All White鞋款，大多數都係復刻款式，作為日常便服配搭尚可，用嚟練跑就好勉強；反之Ultra Boost係三間牌最新、最頂級嘅緩跑鞋款，緩震與回震表現堪稱品牌最強，加埋輕薄、貼腳、彈性高又透氣嘅Primeknit鞋面，無論係襯衫或者實戰練跑都勝任有餘，一個鞋款，對應晒兩種唔同用途，計落抵番晒（如果唔使捱炒價嘅話）！

查詢︰

2789 8198（旺角豉油街21C adidas Megastore）

2730 0157（尖沙咀漢口道17號adidas旗艦店）

文︰Dick

攝︰Homan（產品）