整容神器韓仔Luna無痛變靚

南韓貴為整容王國，整容易過化妝！來自該國的新進手機牌子Luna，旗下TGL800S正是一部整容神器，眼耳口鼻肌膚下巴全部有得執，效果仲比坊間自拍神器自然多多聲！撳個掣五官即變精緻，毋須開刀紮紗布，影完放上交友App必定大把人Follow！

美顏功能豐富，除了例牌的瘦臉假大眼，還可隆鼻、畫眼線兼豐唇，勁過整容！
$2,980

後置1,300萬像素鏡頭連雙LED補光燈，鏡頭平滑，不易刮花。

自拍鏡有800萬像素，數字比一般智能手機高。

可插microSIM及microSD卡，兼容本地LTE網絡。

雙喇叭設於機底，聲音響亮又冇拆。

機背設計有iPhone 6（左）影子，白線位好似。

預載Beauty Shot，取景時能夠為相中人美白、柔膚。

可選擇以星圖解鎖，既安全又有創意。

《Luna Care》可監察溫度、耗電量等系統狀態。

提供Bluelight Filter，過濾屏幕藍光，保護雙眼。

系統只提供英、韓介面，但中文網頁也顯示無誤。

Qualcomm Snapdragon 801處理器有一定效能，玩賽車Game完全唔窒!

AOA力Sell

提起韓Phone，唔係Samsung就係LG，選擇一直不多。幸好水貨商近年積極引入南韓其他牌子，之前有Pantech，近日有Luna。TGL800S是Luna首部作品，為隆重其事，廠方於當地找來人氣女子組合AOA成員雪炫拍廣告，就可知有幾重視。實物攞上手，重183g的它有一定分量，不過四邊渾圓手感卻不俗，而且機背有磨沙金屬質感，配合仿iPhone的上下兩條白色電線膠帶，整體好Cool好有型，絕非價錢相若的山寨機可比。

用星空解鎖

TGL800S的5.5吋屏幕則有1,080p級數，輸出自然唔刺眼，亦沒有韓Phone常見的味精感覺，而且它除支援亮度、色溫調節外，還內置「Bluelight Filter」，容許用戶逐級降低屏幕藍光程度，保護雙眼。另外值得一提，由於Luna有「月亮」的意思，因此機內也有不少相關元素，例如月亮Wallpaper及星空鎖屏等，後者透過連結星星來解鎖，既安全又有創意，抵讚！

執樣自然又順眼

此機前後鏡頭分別為800萬及1,300萬像素，數字中上，並支援連拍、HDR、全景及慢動作等拍攝功能。叫得做整容神器，以上「分唇」當然唔夠；取景時，系統已可為相中人美白兼柔膚，影完更可大修，單是眼睛便有眼眶、眼珠、眼影、上下眼線等細項，另外又可瘦臉、隆鼻、豐唇甚至整番個V煞下巴，全部細項都可逐級加減。小記搵Model測試，發覺皮膚變白的同時，背景無過分曝光，雙眼放大亦不會變ET，效果自然順眼，好實用！