Citroën去年將獨家研發嘅Airbump技術，注入 C4 Cactus Concept身上，仲好快就為C4 Cactus定型量產，跟手贏埋WCOTY世界年度設計車大獎。有好嘢，當然要開心Share，深明此道嘅Citroën，今年就將呢項威水嘅獨門技術發揚光大，炮製出全新概念車—Cactus M Concept，唔出位、點搶鏡？

Cactus M Concept（左）嘅設計靈感，源於品牌經典Méhari（右）。

車身與車廂都用咗大量Neoprene塑膠纖維，容易打理。

座椅表面起用類似潛水衣物料嘅織布製成，花紋夠晒獨特。

獨特外形加上開放式車頂設計，Fun Car形象Show晒出嚟。

車尾木頂架刻有專屬徽飾，以資識別。

應用喺車門上嘅Airbump，有效避免刮花與撞凹。

木頂架有多組手工精緻嘅掛鈎，方便實用。

由於地台特設去水位，就算車廂內積咗沙泥，都可以直接用水沖走。

加裝防水織布篷頂，即時變成流動Camp。

變身防水Camp

Cactus M Concept係專為戶外活動發燒友，尤其是鍾意去沙灘嘅朋友而設計，開放式車頂嘅設計靈感，來自於品牌嘅經典越野車Méhari，亦都正正解釋咗Cactus M Concept嘅「M」字點嚟。Cactus M Concept嘅車身長闊高分別為4,160×1,770×1,480mm，相比起C4 Cactus，長、闊不變，高度就多咗40mm，仲有刻意加大嘅輪拱，又用埋19吋大輪圈。至於以聚酯膠為主、內藏空氣膠囊（Air Capsule）嘅Airbump車身組件，繼續用於兩側車門，以及頭、尾燈組底下容易碰撞嘅位置，而前、後輪拱及泵把就融入Aircross概念車嘅同樣設計，採用黑色防刮物料，避免刮花，甚至撞凹，對於P牌或泊位功力麻麻嘅車迷而言，係唔係好有安全感呢？

設計團隊刻意喺前擋風玻璃加裝粗身木框，又加咗車尾木頂架，遇上滑浪板等長身大型行李，就可架於木框與木頂架之上。廠方又與著名帳篷製造商ATTX及運動紡織品牌Jonathan & Fletcher合作，研發出一種可透過隨車充氣配置，短時間內就可完成搭建、高約180cm嘅充氣車頂帳篷，名為Innovative Roof System（簡稱IRS），令Cactus M Concept搖身一變成為流動帳篷，仲可以加裝防水織布做篷頂，無論落大雨或有大浪冚埋嚟，置身車內都唔會變落湯雞。

追加Off-road能力

內籠方面都有唔少防水設計，例如座椅包上類似潛水衣物料嘅織布，而門壁以至地台都用上Neoprene塑膠纖維製成，防水之餘又有去水位，換句話說可直接沖洗；座椅布局又似足RV或SUV，翻平靠背後，就可變成大床，讓乘客瞓喺度好好休息一番。至於隨車設備相當先進，例如有觸控式屏幕及Easy Push系統等，夾啱晒後生仔口味。唯獨動力配置方面尚未公布，只知用咗Grip Control，具有多種路面適應能力，上山落水都冇有怕。雖則Cactus M Concept仲係概念車階段，不過有C4 Cactus嘅先例可援，只要動力方面未有大變，量產化唔難吖！

文：Konnie