SH-04G 攝影大師

依家拎起部手機就可以影相，不過有時效果都強差人意，好似點影都唔靚。其實，影相除器材外，構圖技巧同樣重要，可惜唔係人人有此概念；日系新手機AQUOS EVER SH-04G就幫到你，皆因其「Framing Advisor」功能可以自動顯示最佳構圖位置，影人、影景或者美食都靚啲！

預載多款主頁風格，當中以docomo LIVE UX最易用，亦係至順暢的一款。
$3,880

機身採用塑膠物料，手感一般。

前置鏡頭於機面下方，自拍控要適應一下！

支援IPX5/7防水標準，因此SIM卡及記憶卡槽設有防水保護蓋。

9.7mm機身稍嫌太厚，幸好重量仍合理。

支援Mini Apps，可用小視窗形式開啟一個指定程式，例如地圖、日曆、相簿等。

採用中階四核心處理器，跑分不足二萬分，幸好操作未見窒機。

內置「My Magazine」，大量日本新聞任你睇。

開啟「Framing Advisor」後，手機會自動偵測並顯示出構圖網格，白色框代表用家選擇主體，綠色框代表建議構圖位置。

移至綠色框之後，框框及格線隨即會變成藍色，表示構圖正確。

自動構圖易上手

日系手機向來重視拍攝功能，Sharp出品的SH-04G亦唔例外，不但備有1,310萬像素鏡頭，試拍時，對焦以及相片質素都極有水準，最特別就係加入「Framing Advisor」功能，可以因應拍攝題材，例如人物、人像大頭、食物、風景等，於拍攝介面加入不同類型的構圖網格。唔識用都唔緊要，因為佢設有Auto模式，拍攝時只要點一下拍攝主體，SH-04G就會自動偵測出最佳構圖，跟住指示將主體移到適當位置就得，初哥都可以極速上手。

窄邊框手感佳

近期Sharp手機最受注目一定要數Crystal X，雖然SH-04G唔似得Crystal X般接近零邊框，但係都採用窄邊框設計，配合5吋屏幕及139g的重量，單手使用都相當舒服。SH-04G亦內置招牌的EDGEST Effect功能，每當有來電以及充電時，屏幕四個邊緣位置都會着起七彩燈，非常美觀。此外，SH-04G係近期少見的中階日系機，搭載Qualcomm Snapdragon 400四核心處理器及2GB RAM，規格數字睇落唔多吸引，但運行Android 5.0作業系統都綽綽有餘，開Apps、撥頁都好順暢。