6呎3吋高、僅重190磅，喺巨人林立嘅NBA，不足以橫衝直撞，但係憑住一招三分波神技，足以令Golden State Warriors嘅控球後衞、「咖喱仔」史堤芬居里（Stephen Curry）喺上一屆攞完MVP再贏埋冠軍指環。雖然作為揭幕戰嘅Pelicans VS Warriors，仲要等到本月28日嘅早上10點半先有得睇，但係Curry嘅英姿已經隨時Show到畀你睇，事關Enterbay啱啱為呢位人氣球星推出咗1/6 Action Figure，頭雕、主體交足貨之餘，波衫、波鞋及其他Parts更加接近完美，恍如一圍圓桌咖喱，「咖喱控」仲唔滿足？

素體關節超過30個，但要留意Ball Joint位幾實，要用多些少力先扭到三分神射手甫士。
EB 1/6 Stephen Curry　$1,588

製作呢款Figure時，Curry仲未贏到總冠軍，呢件冠軍Tee係EB後期趕製，十級誠意！

隨盒附有獨立出世紙，包保每套Boxset都係獨一無二。

五官皮膚其實都算似，衰在表情太木獨，有番啲殺氣會好好多。

衫尾通常攝入波褲內、睇唔到，EB依然車埋尺碼標籤，抵Like！

波衫圖案全部係熨印製成，領口由滴膠變成雙層布料，直頭當正真衫咁做。

咖喱仔出晒名係牙膠癡，依家買Figure送牙膠一塊，攝入口中，神似度立即急升。

隨盒附有藍黃色手帶，其中一對造型手掌，正正係招牌慶祝手勢。

Curry Two上個月喺UA嘅中環專門店舉行本地首賣，灰藍雙色一上架已經被秒殺。

黑白色嘅Curry One ”MVP”並冇行貨輸港，罕有度極高，南華球員陳張敏就擁有一對。

攝牙膠最神似

球迷常言道︰「90s」係NBA最美好嘅年代，所以EB NBA Collection亦「不厭其煩」打造經典球星，Michael Jordan、Dennis Rodman、Scottie Pippen、O'Neal到不日推出嘅Penny Hardaway，雖然全部叫好叫座，但對新一輩球迷嚟講，難免有代溝。如今EB再度「回到未來」，最近炮製咗今期嘅人氣王Curry。開箱後首先檢閱嘅，當然係頭雕啦，坦白講，未有想像中咁神似，但係實物絕對順眼過官圖，五官輪廓到位，膚色喺高清製作技術下，亦見自然有層次，可以收貨，最重要係今期入貨嘅話送牙膠，攝入口中，立即元神歸位，似番好多！

波鞋還原度超高

今次Figure屬於Warriors嘅作客版本，波衫用咗招牌嘅藍黃配色，正面印有隊徽及尺碼標籤，後面就有「Curry」及號碼「30」字樣，全部熨印上去，冇咁易甩色脫落，勝在夠襟。波衫質地亦有明顯進步，摸上手Feel到更輕更柔，袖口又緊貼膊頭，唔似以前咁硬繃繃；同時領口間條紋由雙層布料車成，比過往用滴膠包邊像真得多。件衫靚咗，素體反而有啲失色，雖然關節唔算少，但係膊頭太橫，與真人嘅偏瘦身形有出入，而且雙手關節依然太緊，要花唔少耐性及指力，先擺到似樣嘅三分波英姿。

籃球明星Figure嘅一大亮點，就係波鞋款式，EB Curry隨盒附有咖喱仔上一季嘅Signature Shoe—Under Armour Curry One，仲係黑白色嘅MVP版本，鞋形似到足之餘，就連鞋身嘅「Charged」及「SC」等字樣，以及鞋尾保護罩、鞋面凹凸花紋都如倒模一樣，就連專跟波鞋線嘅同事，「驗屍」過後都話︰「係我見過咁多款1/6籃球鞋之中，做得最似、最Detail。」波鞋以外，隨盒又有護踝、雙色手帶、Leggings打底褲、磁石波、MVP獎盃、總冠軍獎盃、冠軍Tee及地台等配件，又有九款造型手掌，其中一對模仿招牌慶祝動作，玩完筆者都想轉身射個三分波！

鞋款有古講

EB 1/6 Curry係2014/15球季版本，鞋款當然係UA Curry One，新球季將至，Curry大人將會轉用Curry Two。新鞋嘅最大分別係鞋面用料由AnaFoam改為SpeedFoam，變得更加薄身、貼腳、輕巧及透氣；中底沿用全掌式Charged Cushioning泡棉，既緩震，又有一定程度嘅回彈效果。若果EB真係出主場版Curry嘅話，鞋款會唔會變成Curry Two呢？

Facebook：www.facebook.com/enterbayofficial

銷售點：旺角廣華街1號仁安大廈地下12號舖Enterbay

查詢：2332 3615

文︰Gilbert　攝︰Fanny