今年白鞋當道，唔通連美斯嘅Signature Shoe——Messi 15都要跟風？球王又何需隨波逐流，Messi 15嘅最新配色版本，雖則以白色為主，其實係向球王祖國阿根廷致敬，事關messiFRAME框架與messiGAMBETRAX外底都用上藍色，加埋黃色嘅鞋釘，三色靈感正正來自阿根廷國旗。雖則今年係單數年，未有國際大賽舉行，不過美斯已經換上呢款新配色嘅Messi 15，征戰西甲及啱啱開鑼嘅歐聯分組賽，成為南美勢力喺歐洲嘅最大圖騰。

Finale 15/16 UEFA Champions League Official Match Ball　　$1,099
messi 15.1 FG/AG　　$1,699

白、藍、黃嘅配色組合，靈感來自美斯嘅祖國阿根廷國旗。

messiTOUCH嘅柔軟度可與袋鼠皮相比，而且更加耐用。

鞋身兩側後段都有messiFRAME，將腳踭緊緊包圍起嚟。

messiGAMBETRAX外底用上鏤空設計，發揮輕量化作用。

鞋墊印有「built to win」打氣，其實美斯又有邊場波唔係搏到盡？

阿根廷國旗配色

出波Boot都出到咁多Gimmick？無他嘅，身為三屆國王盃及歐洲超級盃、四屆歐聯，仲有七屆西甲冠軍嘅得主，身上嘅一事一物當然都講究過人。新配色嘅Messi 15唔只有意義又Eye Catching，仲有出色嘅功能設計，否則點可以拍住球王征服綠茵場？

就以最頂級、專為真草及仿真草場而設嘅Messi 15.1為例，與主流波Boot嘅最大分別，就係鞋身兩側後段被messiFRAME包圍，messiFRAME係由TPU製成嘅框架，顯而易見，可以大大增加對腳掌嘅支撐，尤其是鞋領位置，有效減少腳踭過度滑移導致拗柴嘅機會。鞋身前段用上messiTOUCH，以人造纖維製成，柔軟與貼腳度直逼袋鼠皮，仲有更好嘅耐用性，而且表面布滿微細嘅凹位，藉此加強控球效果。至於messiGAMBETRAX外底彈性高、韌度足，足以對應美斯經常急速轉向嘅打法，而且與messiFRAME一樣用上鏤空設計，促成輕量化效果。細心嘅話，仲會發現鞋釘布置亦有玄機，由於美斯係濕水欖核，最叻左扭右扭，故此鞋頭與鞋尾嘅第一排鞋釘都用上圓形設計，以便進行全方位轉向，至於其他鞋釘就改用抓地力強嘅三角形，令唔同動作都可做到又快又穩。其實adidas有冇惻隱之心？將Messi 15.1設計到咁厲害，有冇諗過作為球王對手，例如歐聯E組嘅羅馬、利華古遜及巴迪球員嘅感受？

米蘭特色專用足球

每屆歐聯都有專屬嘅Official Match Ball，今屆都唔例外，以adidas Finale為基礎，Polyurethane球面彈性高又耐用，兼有防水與防變形功效，加上熱融無縫嘅製作方法，以及球面超微細嘅凹凸紋理，增加球感之餘，亦都令adidas Finale可以喺空中做出更快、更刁鑽嘅飛行軌迹。外觀方面，由於今屆歐聯嘅決賽地點係意大利米蘭，而米蘭以藍色巨蟒作為傳統代表，故此球面上嘅星星用上藍色之餘，仲印有蛇皮紋理，星星中間又有直線貫穿，呢啲直線係由紅黃藍綠等多色組合而成，事關今屆世博正喺米蘭舉行，而世博旗幟就由唔同顏色嘅方塊組合而成。地道色彩如此濃厚，只可惜同市嘅兩大班霸—AC米蘭與國際米蘭都與今屆歐聯無緣，相信意大利球迷都會耿耿於懷吧！

查詢：

2527 0217（旺角通菜街63-65號地下adidas Football Store）

2317 1686（旺角亞皆老街朗豪坊7樓L701 Futbol Trend）

文︰Dick

攝︰Homan