《星球大戰》除捧紅阿Luke同黑武士兩父子外，一眾機械人亦同樣受粉絲歡迎，舊傳有R2-D2及C-3PO，至於EP7《星球大戰︰原力覺醒》就一定係Trailer入面搶晒鏡嘅BB-8。電影12月先上畫，但美廠Sphero出品嘅BB-8遙控機械人就率先覺醒，手機遙控行得又劈得，仲曉巡邏兼播放全息影像，像真度超高，難怪一出就賣斷市！

$1,180

符合1/6比例，拍埋同比例的R2-D2 Figure旁邊明顯矮一截。

頭部設有眼睛及天線，不過天線頗為脆弱，小心撞爛。內藏滾輪及磁石，配合磁力便能吸實下半身。

球形下半身如實印有機械花紋，忠於原設。

附送無線充電座，叉爆一次夠玩60分鐘。

設有動作熱鍵，例如點頭、擰頭及跳舞等。

提供虛擬控制面板，可校準BB-8並控制前後左右移動。

巡邏模式實時提供溫度、行走路線及平衡值等參數。

可用前置鏡頭錄影，之後經手機屏幕便能看到BB-8投射出全息影像。

行走速度可任意調校，最高時速達5mph，走住先追到佢！

自從香港玩具反斗城舉行「Star Wars Force Friday」首賣派對後，星戰EP7玩具便排山倒海地推出。在芸芸新品中，又以Sphero BB-8最矚目、最搶眼，甚至比大奸角Kylo Ren的人偶更為熱賣。呢隻BB-8按照1/6比例製作，高11cm，由半圓形頭部及球形下身組成，塑膠製造的它像真地塗上橙白銀三色，並同時設有天線桿、眼睛及各式機械花紋，外形跟足電影機設，粉絲冇投訴。美中不足的是表面太光鮮新淨，若加入少許舊化效果，感覺一定更真實。

手機控制行走

咪睇BB-8外形簡單，原來內藏陀螺儀、平衡重物、母板、無線充電線圈及摩打等精密零件。一經啟動，陀螺儀會讓BB-8在移動中保持平衡，並以磁力吸實頭部，因此下身就算轉得多快，頭部都不會掉下，十足不倒翁咁過癮！小記試玩，只要安裝好《Sphero BB-8》程式，再把手機靠近BB-8旁邊作配對，之後便能透過虛擬控制面板指揮BB-8前後左右移動、打圈、四方巡航及急煞；玩家甚至可要求它點頭、擰頭或以極速行走，加上不時發光，讓大家搖身變為它的主人Poe Dameron。

可錄全息影像

BB-8賣成千蚊，淨係識行當然唔收貨，它還具備學習功能，既懂得回應玩家指令，玩得耐仲會有開心、困惑及害怕等情緒聲音。另外，玩家還可開啟巡邏模式，讓它到處滾動兼避開障礙物，恍如家中寵物一樣。數到最好玩，不得不提「Message」功能，玩家只要用App拍一段短片，之後把鏡頭移到BB-8身上，在相機介面中的它便會投射出剛剛錄下的全息影像，重演當年Princess Leia被R2-D2投射的經典一幕。BB-8隨盒附送無線叉座，不過充3小時先玩到60分鐘，未必夠成班星戰迷輪住玩喎！

查詢︰3102 2783

文︰Gilbert　

攝︰Man