好多NBA球星嘅Signature Shoe，都會大玩「思鄉」主題，Derrick Rose更加開宗明義，佢嘅副線鞋款就命名為D Rose Englewood，係專為街場而設，全新嘅第四代就喺今年夏天上架。以往嘅D Rose鞋款，最深入民心嘅就有玫瑰紅，以及代表Chicago Bulls嘅紅黑雙色兩種版本，適逢今夏adidas嘅「Take on Summer」活動以淺藍為主題顏色，D Rose Englewood 4亦都玩玩新意思，以呢款代表夏日、陽光、活力嘅新色為主打，分外Sharp醒！

adidas D Rose Englewood 4
$899/對

外底嘅人字形紋理，抓地力OK，若然加入前後掌分割設計，就可增加靈活性。

作為Derrick Rose嘅其中一款Signature Shoe，鞋身多處都有專屬嘅玫瑰標誌。

除了顏色有別，三種配色嘅鞋頭用料亦有不同，由左至右分別係膠皮、人造皮與麖皮。

中底Bounce嘅吸震能力，勝過同廠嘅adiprene與adiprene+。

鞋身中段設有足弓綁帶，藉此加強支撐效果。

adidas Rose Logo Tee
$219

adidas Rose Link Short
$299

未忘成名前

D Rose Englewood 4屬於街場鞋款，而無論你我他等凡夫俗子，以至Derrick Rose等天王巨星，有邊個未打過街場？Englewood位於芝加哥南部，係Derrick Rose出生以及成長嘅地方，童年時，佢嘅三位哥哥就帶住佢喺當地嘅街場打波。好多球星描述自己嘅出生地時，都會宣揚家鄉風景好靚、民風好淳樸、有好多美食……以上種種都好難喺Englewood搵到，事關當地係九反之地，犯罪率好高；隨住Derrick Rose嘅籃球天分被發掘出嚟，喺當地愈嚟愈有名氣，媽媽Brenda與一班哥哥愈加保護佢，甚至告誡佢要拒絕籃球場以外嘅誘惑，多得家教甚嚴，Derrick Rose先冇誤入歧途，得到今日嘅成就。喺Englewood嘅歲月，Derrick唔只練出球技，仲有堅定嘅心志，故此除了主線嘅D Rose系列外，Derrick Rose就以Englewood作為個人副線鞋款嘅名稱。

Bounce緩震交足貨

不經不覺，D Rose Englewood先到第四代，今次有何賣點先？除咗上文提及嘅特別配色外，功能設計有更大變化。雖然喺定位方面，D Rose Englewood 4比唔上將於10月推出、室內場專用嘅D Rose 6，但係緩震方面亦都交足貨，中底用上比adiprene更軟身、吸震能力更高嘅Bounce，而且厚度相當高，就算重磅嘅用家都可以放心用。此外，以往嘅D Rose Englewood僅鞋頭設有氣孔，今代就喺鞋身兩側都有，配合鞋舌嘅網布，藉此改善舒適度。鞋面材料以耐用嘅人造皮革為主，而鞋舌頂部與鞋領內側都內藏厚厚嘅泡棉，增加貼腳效果。除此之外，鞋身中段有一條足弓綁帶，橫跨兩側與鞋帶區，藉意加強支撐作用，雖然橡筋材料有一定彈性，但係如果加入鬆緊調節，或者改用搭帶嘅話，效果會更理想。外底設計亦有讚有彈，人字紋布局喺街場的確發揮到理想嘅抓地力，不過整片外底都係一幅式剪裁，感覺硬咗啲，唔似前後掌分割咁靈活，希望下一代會作出改善啦！

查詢︰2730 0157（尖沙咀漢口道17號adidas旗艦店）

文︰Dick　攝︰Homan