Gangnam Style居酒屋　必Take麻藥粟米

要數近年最受歡迎的菜式，韓國菜必定穩坐三甲。港、九、新界無一不缺的韓式炸雞店或韓燒店，韓流不但沒冷卻下來，最近更興起走型格路線的韓國料理餐廳，像尖沙咀的「The Joomak Hong Kong」由環境到菜式都擺脫老套感覺，大賣時下最流行韓食，向大家宣示韓國菜都可以Young得起！

Joomak芝士燒粟米 $78
粟米燒前先蒸15分鐘至熟，抹上牛油烤熟後撒上辣椒粉、帕爾馬芝士粉及糖粉等，甜甜辣辣會食上癮，難怪在韓國有「麻藥粟米」的稱號。

卡邦尼炸雞　$118
香港店限定菜式，炸雞用秘製醃料醃足兩日，用大火炸至皮脆肉嫩，淋上香滑的卡邦尼醬汁，味道非常匹配。

韓式咖喱蒸五層肉　$158
五花腩先放入咖喱汁內浸煮，上枱前再淋上比日式咖喱更甜的韓國咖喱醬汁，吃時伴以白泡菜，感覺清新。

人參鮑魚牛肋骨湯　$198
先用雜菜煮成清湯，再加入牛肋骨、白蘿蔔、紅棗、栗子、韓國人參同煮，牛肋骨軟腍入味，鮑魚爽口鮮美。

辣炒海鮮年糕　$108
選用米做的年糕，貪其特別軟糯又富米香，加上青口、魷魚及蝦等配料，並以韓式辣醬來炒，升級版的傳統小食！

廣藏泡菜煎餅　$88
泡菜先沖洗再瀝乾水，泡菜味不會過鹹又不會太辣，煎餅邊位香脆，叫人食完一塊又一塊。

紫菜白飯　$48
將混和醃蘿蔔粒及大量紫菜的飯，用手隨意搓成飯糰狀，飯粒拌有韓國麻油，香味十足。

餐廳裝潢走工業風格，水泥牆身配木紋枱及大吊燈，型格十足。

等到了！終於不再是一式一樣、面目模糊的炸雞店、燒肉店，新一輪的韓流將韓式居酒屋帶到來香港。總店在韓國江南中心地帶的The Joomak，以「朝鮮酒幕」自居，亦即是韓式居酒屋，店名Joomak有Bistro的意思。餐廳於韓國有6間分店，在新加坡及馬來西亞亦見其蹤影，老闆Steve Lee是韓國人，曾在美國讀書，並於意大利、中國及澳洲等地從事餐飲工作。熱愛飲食的他，見韓國菜在美國頗受歡迎便決意再下一城，將傳統韓式居酒屋變得更潮、更年輕。甫踏進餐廳，即見牆身用燈泡砌成的「Joomak」字樣，非常搶眼，配搭水泥牆身、木紋枱、金屬吊燈等走工業風的設計，夠晒型格。

香港限定卡邦尼炸雞

來香港開分店，餐牌上有9成菜式跟足韓國本店，既有傳統菜式，亦有新派韓國料理。大廚更特別為香港店設計全新菜式，誠意十足，像首次推出、連韓國總店都冇得食的「卡邦尼炸雞」，選用啖啖肉雞髀，切成細條狀後，以油、秘製醬油及香料等，分3次調味並醃足2日，唔入味才怪！用大火將雞髀肉炸至金黃香脆，最後淋上意大利卡邦尼醬汁，雞件脆卜卜、醬汁香滑。大廚又特別在醬汁中加入三色椒及洋葱等蔬菜，令菜式賣相更Colourful，同時又能清減油膩感。

餐廳走Young的路線，又點少得韓國流行的人氣小食？近年在首爾街頭隨處可見的「麻藥粟米」當然有得食，先將本地粟米蒸煮，抹上牛油後再將表面烤至微微焦香。最後灑上韓國蒜粉、帕爾馬芝士粉、辣椒粉及大量糖粉，又甜又辣好惹味。吃時將粟米粒切出，與多種調味粉拌勻同食，好味到好似麻藥般令人上癮。

升級版傳統料理

傳統的韓國菜式亦花盡心思炮製，其中人參鮑魚牛肋骨湯先用洋葱、蘿蔔等雜菜熬足兩日成基本的清湯底，再加入牛肋骨、白蘿蔔、紅棗、栗子、韓國人參等同煮，每一口都是蔬菜的清甜味，大廚在牛肋骨表面輕（界）幾刀，令牛肉吸收湯的精華，軟腍入味。見慣見熟的泡菜煎餅也是改良版，大廚將泡菜沖洗後榨乾，既可避免過於濃味及太辣，入口餅的中心煙韌，邊位則香脆。另一道最能代表韓國的炒年糕，米做的年糕口感軟糯，配以辣中帶甜的韓式辣醬來炒，再加上青口、魷魚及蝦等海鮮配料，成為Upgrade版炒年糕。

居酒屋又豈能沒有酒？餐廳正申請酒牌，稍後會推出燒酒及多款馬格利酒配生果飲品，例如以Jar盛載的「提子馬格利酒」，提子先在韓國釀製再運到香港，加入真露、馬格利酒及冰塊拌勻，感覺似沙冰，酒味偏淡又帶果香，很易入口。另更有由韓國老闆創作的Cocktail及Mocktail，一手拎酒杯、一手忙着夾炸雞，才是到居酒屋最快樂的事情。