好跑唔嘥油　Audi A5 Sportback 1.8 TFSI multitronic

轎跑都識慳油？奧迪（Audi）A5 Sportback 1.8 TSFI就咬牙切齒話你知︰一定得！今次詳測三日，實際耗油量只有7L/100km，以現行油價計算，即係$1.0/km左右，同一部1.5L家庭房車差唔多，以咁嘅油費都可以享受到1.8L直四Turbo嘅威力，仲有理由唔Like？

車身線條融入轎跑嘅大斜背特色，動感與優雅兼備。

1.8L直四TFSI引擎唔只低扭出色，低耗油表現更加抵Like。

今時今日嘅Turbo車，已經大大減少咗Turbo Lag嘅影響，A5 Sportback 1.8 TFSI multitronic就係好例子，試車全程都好易操控，就算Turbo介入都不慍不火，唔會突然發狂嚇窒人。

車尾置物量多達480L，收起後排仲可以擴充至1,280L。

後排無論係Head-room或Leg-room都見鬆動，冇預期之中咁易頂頭。

前排既有電動控制功能，多幅式剪裁對背部與下半身都有十足承托。

打開天窗後，車廂感覺即時開揚起嚟。

18吋多幅式鋁合金輪圈已屬標準裝備，有型有款。

雙圈式儀錶板布局分明，中間設有小屏幕，豐富行車資訊。

中控台設有6.5”屏幕，對應MMI及泊車感應系統，有圖又聲夠易用。

配上八前速Multitronic自動波，加速爽快又易Handle。

動感與優雅兼備嘅A5 Sportback，車身設計融入轎跑嘅大斜背特色，線條極盡流暢，仲記得第一日試車，由金鐘陳列室攞車，之後途經灣仔告士打道過紅隧出尖沙咀，短短唔到10km嘅路程，已經發覺有唔錯嘅收視率。喺跑化外觀之下，車廂布局傾向轎車化，寬敞空間處處有真皮包裹，前排嘅跑化座椅附設電動調控功能；後排雙座位亦見鬆動，就算係五呎八吋高嘅攝影師都唔怕頂頭，可以安坐其中。咪以為轎跑就冇實用性，A5 Sportback嘅車尾就有480L置物量，收起後排仲可以一舉增加至1,280L，拍得住唔少中小型SUV。

低扭勁　起步爽

性能方面就由1.8L直四引擎擔綱，容積唔算大，但係有Turbo，所以馬力與扭力都有可觀表現，分別去到170hp及32.6kgm，起步爽快有勁，與峰值扭力早於1,400rpm已經全數到位有密切關係。加速方面，就算Turbo介入都傾向斯文，唔會突兀嚇人，引擎與八前速Multitronic波箱亦相當合拍，轉檔反應直接又順暢，快感之中兼顧乘坐舒適性。途中沿荃錦公路入元朗，呢條山路出名多斜多彎，由於A5 Sportback嘅車身較低，喺低重心嘅作用下，攻彎相當準繩，過彎時車身只有輕微傾側度，全程都保持穩定。

夠慳家　油費$1.0/km

至於上文提及嘅耗油量問題，經過連續三日測試，穿梭港九新界，包括喺繁忙時段塞咗半個鐘先塞到入紅隧往金鐘，最遠試過由元朗沿新界環迴公路新田段駛入吐露港公路，再經大老山隧道出觀塘，總共行咗約300km，錄得7L/100km嘅平均耗油量，按目前油價計算，油費只係$1.0/km左右，針冇兩頭利呢句千古名言，喺A5 Sportback 1.8 TFSI multitronic身上用唔着了。