近期天氣陰晴不定，上個禮拜仲熱到HiHi，依家又連落幾日雨，不過對熱血球迷嚟講，So What？「連個天都唔鍾意我」又如何，好天曬落雨淋都阻你唔到嘅！Nike Basketball今期推出嘅Rise Collection，就專為街場環境而設，即使地面幾咁粗糙都好，都可以幫你征服外部環境，練出一身好功夫！

LeBron Soldier 9　$1,199

Dynamic Flywire與搭帶相連，只要將後者索緊，就可加強鞋面嘅支撐力。

Kyrie 1　$849

撞色分明之餘，鞋舌上嘅個人Logo仲用上銀面設計，分外Eye Catching。

KD Trey 5 III　$799

鞋身前段加設搭帶，增加鎖定效果。

Kobe Venomenon 5　$949

出於耐磨需要，外底棄用Kobe 10嘅顆粒布局，改用深刻嘅不規則紋理。

有邊個籃球狂迷，唔係夢想做NBA球星先；做得NBA球星，又點會唔想有自己嘅Signature Shoe光宗耀祖？無論係新秀狀元或天王巨星，又有邊個冇經歷過街場嘅奮鬥歲月？故此Nike Basketball今代唔只有LeBron 12、Kobe 10及KD 8等專為室內場而設嘅高階鞋款，同系仲加設專為街場而設嘅副線選擇，分別有LeBron Soldier 9、Kobe Venomenon 5及KD Trey 5 III，連同室內與街場都Fit到嘅Kyrie 1，就組成稱霸街場嘅Rise Collection。

外底更耐磨

針對街場惡劣環境，全線Rise Collection鞋款嘅外底都有針對性設計，用上特別耐磨嘅橡膠製成之餘，外底紋理嘅深度，都比上文提過嘅高階鞋款深得多，喺凹凸不平以至滿布沙塵嘅街場上，都可發揮理想嘅抓地力。

至於各自嘅鞋款特色方面，先講Kobe Venomenon 5，整個中底用上具吸震力嘅Phylon，前掌又有反應高嘅Zoom Air，其實緩震效率都追貼Kobe 10，最抵讚係鞋面用上Hyperfuse設計，底層與面層分別係網眼Mesh及無縫尼龍網面，透氣效果更勝Kobe 10，就算打街場冇冷氣，都唔怕焗腳。LeBron Soldier 9就強調保護性，沿用LeBron 12嘅中筒設計外，最特別係用咗雙搭帶，大大加強對腳掌嘅鎖定作用，尤其是鞋身中段嘅搭帶，與鞋頭嘅Dynamic Flywire串連起嚟，令前掌變得更包腳，配合前、後中底都有Zoom Air，保護性之高，可說是全系之最。

KD大變身

KD系列一向主攻低筒款式，不過街場版嘅KD Trey 5 III一反常規變中筒，就連鞋底都厚過KD 8，可想而知保護性亦係KD Trey 5 III嘅設計大方向，而且鞋尾內藏硬身物料，鞋領又有厚厚嘅泡棉墊位，加埋鞋頭嘅橫向搭帶，由前到後發揮可靠嘅鎖定作用，防止腳掌喺鞋籠內出現過度滑移。最後講Kyrie 1，功能設計上與今年初首度上架時一樣，藉Hyperfuse鞋面與前掌Zoom Air，帶嚟輕量化與反應快等特性，最大亮眼之處係用上對比分明嘅撞色組合，與同系其他三個鞋款一樣，充滿陽光氣息。

查詢︰2520 0771（灣仔莊士敦道68號互信大廈地下Nike Basketball）

文︰Dick　

攝︰Ben