有甚麼人會「以為自由是一種病」？就係被當權者洗腦，信奉極權壓倒一切嘅人囉，呢種反智思想，唔只凱撒年代嘅古羅馬，就算去到21世紀都依然大有市場，甚至喺《機動戰士高達Seed》故事之中，無論「地球聯合」或「Z.A.F.T.」嘅當權者都用呢種伎倆去愚民，製造矛盾互相攻伐；惡人自有惡人磨，呢兩個踐踏自由嘅極權政體，最後都敗喺「自由」嘅炮火之下，開炮者，就係自由高達（Freedom Gundam）。

Robot魂
ZGMF-X10A Freedom Gundam
建議零售價：¥5,500

隨盒附有一對分拆式及一支合體式劍柄，以便擺出唔同嘅出劍甫士。

論精細度，RG模型版本當然稍勝一籌，但係雜又脆弱嘅骨架，難免令人顧忌多多，始終可玩性係Robot魂版本嘅強項，今次嘅自由高達都唔例外，所有關節都可以放心扭。

想當年HCM Pro自由高達嘅面相塗裝，唔少粉絲中「Sad貨」，今次Robot魂執番靚晒，放心！

小腿背後嘅噴射器可以開合，腰後可以掛起MA-M20步槍，其實都係基本嘢，意料之內。

初回特典唔只有印刷精美嘅圖冊，最毒嘅係圖冊內有機體標貼，除咗自由高達，仲包埋今個月尾推出嘅正義高達及明年1月嘅天帝高達，即係引你買埋呢兩部高達，中伏未？

Robot魂
ZGMF-X09A Justice Gundam
建議零售價：¥6,000（預計本月尾上架）

Robot魂
ZGMF-X13A Providence Gundam
網上訂購價︰HK$680
（未連運費，預計明年1月派貨）

資深一輩嘅高達迷，奉元祖高達RX-78-2為王道，至於新一代嘅粉絲，就視自由高達為最愛。自由高達於《機動戰士高達Seed》嘅後半段登場，受捧原因除咗因為係第一男主角基拉．大和嘅專用機，形象夠晒正派之餘，其屈機級數嘅造型美與戰鬥力，令粉絲念念不忘，難怪自由高達嘅商品可以出極都有、款款熱賣，最近仲突入Robot魂系列。

造型完勝HG

兼具造型美與高可動性嘅Robot魂系列，係唔少高達迷嘅必入Item，今時今日，仲有幾多人有時間、夠技術去砌模型？開盒即玩嘅Robot魂正好投其所好。先講造型，Robot魂自由高達嘅整體比例，與大小相近嘅HG模型版本相比更加修長，更加接近動畫嘅機設風格，而且喺配色方面，用淺灰色代替模型版嘅純白色，感覺上有Metal Build嘅影子，最抵讚係頭部，由雕工到塗裝都做到細緻、準確，質素之高，個人認為係芸芸Robot魂高達之中嘅No.1，尤其是面頰兩旁嘅灰色部分，即使細過芝麻，Bandai今次都冇側側膊偷工減料，如果全身再做多啲滲線工夫嘅話就更加冇得彈。

實淨四重炮

自由高達睇得又打得，事關佢有威力大，而且炮炮準嘅重火力武器，分別係一對藏於飛翼之內嘅M100光束炮，以及腰側嘅MMI-M15電磁炮。呢兩款火炮唔只噸位大，又有摺疊式設計，以往喺模型版身上都會出現結構欠穩陣嘅問題，Robot魂就冇呢個憂慮，事關每個關節位都做得相當實淨，夠力撐起火力全開嘅招牌甫士。除此之外，由於腰側掛咗電磁炮，模型版嘅大腿可動性難免受到影響，Robot魂就以Ball Joint將電磁炮與主體連接，令電磁炮可以大幅度後移，大大減少對大腿嘅阻礙，而且手肘、膝頭用咗雙關節之餘，就連上半身都用上多重關節組合，後者可以擺出大角度嘅俯仰動作，令自由高達嘅飛行甫士變得更自然。《Seed》嘅結尾有自由高達出場，平息戰火喚醒民眾，不過喺現實世界，就唔好發夢可以假手於人，自由，係要自己努力爭取，邊個話高達控就係不問世事嘅宅男？聽聞G Phone都係同道人，你懂的！

爆Seed三重奏

有Freedom，又點少得Justice？與自由高達聯袂上陣，合拍程度有如戴志偉與麥泰萊嘅正義高達（Justice Gundam），就將於本月尾登陸Robot魂系列。除此之外，故事尾段嘅終極Boss—天帝高達（Providence Gundam），現已於p-bandai hk接受網上訂購，將於明年1月派貨，Seed系粉絲嘅銀包，今次仲唔係三重大出血？

查詢︰2433 1828（瑞華行）

文︰Dick

攝︰Homan