Iron Man喺玩具市場上有幾Heat？唔只1/6以至1/9 Figure大行其道，就連出開日系角色嘅Bandai，都要破例反傳統，喺自家嘅SHF系列都出埋一份之餘，仲有玩得更盡更激嘅後着，就係同國寶級角色「咸蛋超人」Ultraman玩Crossover。最近上架嘅「Ultra Act × SHF」 Ultraman，就似係咸蛋超人嘅裝甲服變奏，對於咸超嘅Die Hard粉絲而言，接唔接受呢次嘅裝甲變身呢？

Ultra Act × SHF Ultraman　建議零售價︰¥4,800

無論係Ultra Act或者SHF，都以高可動性見稱，依家兩者Crossover，又點會令人失望。

前臂護甲有三款型態，由左至右分別係基本型、閘刀型，以及插入十字死光Parts嘅拉長形。

新版Ultraman嘅故事，要從2011年講起，話說當年清水榮一與下口智裕創作咗一套全新嘅《Ultraman》漫畫，劇情承接元祖第一代咸超劇集，地球表面上回復太平，實質仲有唔少怪獸潛伏其中伺機作惡，但係咸蛋超人已經返咗家鄉M78星雲，第一代嘅「宿主」早田進年紀大，又唔可以再變身，點算好？原來早田進後生時變身做超人，不知不覺間令身體導入咗超人基因，仲傳埋畀仔仔早田進次郎，而科學特搜隊（SSSP）就開發咗戰鬥服Ultraman Suit，雖然唔可以變大，但以類似Iron Man嘅「着裝」方式，令進次郎都擁有Ultraman嘅戰鬥能力，繼續為保衞人類而戰。

新招殺敵　閘刀傍身

新漫畫嘅劇情幾似《MIB》，但係Ultraman嘅人設風格與「組身」方式，自自然然令人聯想到Iron Man，今次嘅新Figure就成功還原「人形機甲化」嘅人設神髓，驟眼一看，整體輪廓以至配色的確似足咸蛋超人，近睇嘅話又會發現另一種風格，全身布滿線位之餘，頭部、胸部、前臂、膝頭以至腳踭等多個位置，統統變成線條硬朗嘅裝甲，如果唔知道上文提及嘅故事簡介，仲以為Iron Man真係同Ultraman玩Crossover。對於傳統嘅咸超粉絲而言，或者未必接受，但係與元祖相比，筆者個人認為更「接地」、更合理，相信會有助吸納新粉絲。

Ultraman角色多不勝數，但係必殺技都係殊途同歸嗰一招——超人死光，今次嘅「Ultra Act × SHF」 Ultraman唔只跟足，仲有新Gimmick。話說新版Ultraman唔似老爹咁樣，雙手擺成十字就可以放死光，而係要靠前臂嘅特製護甲，呢對護甲伸長時，就可以產生以及發射Spacium光束，就似傳統嘅十字死光，用嚟對付Big Boss；但係喺一般戰鬥情況下，唔使用到咁大殺傷力時，護甲就會收窄Spacium光束，令前臂多咗對護身閘刀。Figure版本就有三款護甲組甲，分別係基本型、閘刀型及拉長型，後者專門對應超人死光特效Parts，玩味當然高過以往嘅Ultra Act系列。

主體尚可　細節扣分

造型有新意，可玩性又高咗，新版Ultraman Figure豈非完美之作？係……就好喇，可惜B記又再捉到鹿唔識脫角，由SHF到Robot魂，滲線不足呢個老問題又再喺呢款新Figure身上出現，白白浪費咗豐富嘅線位。除此之外，即使雙眼由以往嘅咸蛋黃變成矇豬眼，唔代表可以偷工減料連透明材料都慳番！仲有，Ultraman Suit係SSSP辛辛苦苦研發出嚟，漫畫中嘅人設領位就有SSSP嘅隊徽，Figure就冇咗呢個細節位，咪話大意唔記得，盒面Boxart都印咗，偷懶就真；仲有仲係，由元祖到新漫畫，當Ultraman嘅變身時間就用晒，心口盞燈就會變紅時，但係今次Figure只有正常嘅藍燈Parts，標價¥4,800，咁都要慳，對唔對得住廣大嘅咸超粉絲先？

查詢︰2433 1828（瑞華行）

文︰Dick　攝︰Homan