《Until Dawn》恐怖驚慄攞你命

估不到連外國恐怖Game都會同盂蘭節夾Timing，所說的是PS4獨佔的《Until Dawn》。本作故事架構同荷里活驚慄片相似，講一大班後生仔女去荒山野嶺，想解開謎團，點知逐個成為面具殺手的「點心」。遊戲相當有誠意，請來一班荷里活演員擔綱演出，仲引用埋蝴蝶效應理論，只要玩家做錯一個決定，隨時累街坊！究竟天光之前有幾多個角色仲有命？就睇大家造化。

角色仲大膽到玩碟仙，諗住搵出早前一對姐妹遇害的真相。

作為一套仿荷里活電影製作，又點少得適量地加入養眼場面來中和驚慄氣氛。

動用Killzone Shadowfall繪圖引擎，光影效果表現出色，甚至是雪地留下腳印的效果都頗真實。

由荷里活影星Peter Stormare扮演的心理醫生Dr. Hill會在每關後為玩家作出心理評估，「達哥」形容這位心理醫生表情甚奸，應有古怪。

遊戲中不乏調情場面，但能否成功，主要睇玩家操控角色時的態度同選擇。

遊戲達人「達哥」試玩過《Until Dawn》幾個Chapter，佢表示可以從遊戲中睇到各種人性；而且毋須練習，一玩上手，玩法好啱佢咁話。

蝴蝶效應主宰遊戲

可能大家會發覺《Until Dawn》都好似幾年前的《Heavy Rain》或《Beyond：Two Souls》同樣好着重劇情，也充滿電影感，皆因近年就係興這類設計的冒險遊戲。對這類遊戲作劇透確係死罪，所以目前公布的故事內容非常少。另外，本作好着重「蝴蝶效應」這個概念，玩家一時之間做出的微細決定，分分鐘會令其他角色在一連串連鎖反應下遭遇不測。若在遊戲中觸發到蝴蝶效應場面，遊戲會即時作出提示，好朋友可能因你而命喪在變態殺手之下，千萬要小心。

荷里活演員擔綱演出

話說《Until Dawn》找來荷里活班底製作，故事是由荷里活編劇和恐怖故事作家Larry Fessenden及Graham Reznick聯手編寫；至於遊戲主要出現的八位後生男女角色，仲有表情睇落都幾邪的心理醫生，以及一早遇害的姐妹都是由荷里活演員演出，比較有名係Sam一角，乃是由美劇《Heroes》女角Hayden Panettiere飾演，至於電影《翻生侏羅館》的木乃伊王子Rami Malek則飾演Josh Washington，透過這班專業演員演繹，隔住個芒都能感受到恐怖氣氛。大家有睇開類似的荷里活驚慄電影都應會知道，驚嚇場面之餘都會有「溫柔」一面，所以本作也有角色間的調情場面，不過就點到即止。

考大家臨場應變能力

由於遊戲發生在黑夜，故整個畫面都非常黑暗，主角們通常只能靠一支手電筒睇路，而且大多時間都不能攜帶武器，當遇到突發情況時就只有「危險速逃」；不過話時話遊戲在得到Killzone Shadowfall引擎加持下，光影效果和落雪場景都做得幾靚。遊戲沿用「QTE玩法」，即是要在極短時間內根據畫面上的提示來按鍵，如果稍一不慎按慢了，或多或少可影響劇情之後的發展。另一方面，為了加重驚慄及生死攸關的氣氛，在重要關口作出選擇時，系統只係畀兩、三秒時間大家考慮，考大家臨場執生能力！