相信唔少波鞋控都收到風，知道白色Ultra Boost有望年尾到港，很想要吧！我都知白色係今年波鞋界嘅王道，但係人人都跟風嘅話，又何來特別？況且仲有幾個月先上架，波鞋控忍到手咩？最近adidas HK就入咗多款新色Ultra Boost，有少女Feel嘅粉紅色，又有易Carry嘅深藍及銀灰，以及最Sharp醒嘅螢光黃，既想跑得快，又想潮得起，唔使等年尾，依家就Take Action！

Ultra Boost（女裝）
$1,499/對

Ultra Boost（男裝）
$1,499/對

Stretch Web網紋外底可以進一步發揮Boost嘅能量回饋特性，藉此提升緩震與回彈表現。

鞋身兩側嘅品牌Logo，亦係主要嘅支撐組件，發揮固定腳掌嘅作用。

Primeknit織物鞋面嘅密度與延伸度，針對腳掌唔同位置各有分別。

鞋底中央設有Dual Density Torsion System，進一步協調前、後掌嘅動作，減少拗柴機會。

留意鞋踭設有Heel Construction，配合中間嘅U形凹入式設計，鎖緊踭位之餘亦保留充足嘅活動幅度。

喺#Boostmyday宣傳之中，連詩雅就萌爆示範咗Ultra Boost跑步又得，行街都得。

Ultra Boost係adidas Performance之中嘅旗艦級跑鞋，唔只Sell功能，仲標榜時尚設計，Primeknit織物鞋面已經食正潮流，仲有無窮嘅延伸性，今年初啱啱推出時，品牌唔只搵咗多位體育明星出席喺紐約舉行嘅首發會，《GRAZIA》韓國版又搵嚟「Girl's Day」嘅Yura示範潮襯Ultra Boost，仲有Vogue網站野生捕獲Kanye West着住Ultra Boost行街，頓時令唔少冇跑開步嘅潮人，都視Ultra Boost係必備神物。

眾星示範型得起

除咗首輪嘅紫黑色，Ultra Boost之後都有多種顏色陸續上架，例如粉紫、橙和藍等，最近仲多埋粉紅、深藍、銀灰及螢光黃，就以後者最得筆者歡心。相對於同系其他版本嘅淨色賣相，螢光黃版本嘅Primeknit鞋面其實混入咗黑色，就連鞋身兩側嘅三間商標都轉用黑色，與螢光黃形成強烈對比。Ultra Boost有咁多新色登場，目的係想Show畀大家知，跑鞋並唔係練跑、比賽先用得着，仲可以成為潮服配搭，adidas HK就搵嚟連詩雅、林德信及陳家樂等藝人拍攝「#Boostmyday」造型，無論日與夜、行街或者運動，都可以用Ultra Boost襯出至型一面。

功能表現同門之最

Sell樣之餘，講到尾，Ultra Boost都係一款專業級跑鞋，甚至被譽為品牌史上最偉大嘅跑鞋（The Greatest Running Shoe Ever），功能表現到底有幾巴閉先？首先中底所用嘅Boost，就比同門嘅Energy Boost加多咗20%，而且Boost中底與鞋籠之間不設EVA分隔，令用家可以直接感受到Boost超強嘅吸震與回彈表現；品牌更為Ultra Boost設計咗全新Stretch Web外底，一幅過嘅網紋布局，彈性比傳統外底為高，可以進一步發揮Boost嘅優點。至於Primeknit織物鞋面唔只得個樣，針對腳掌唔同位置嘅活動幅度，以及對支撐力與透氣度嘅不同要求，織物結構亦有精心部署，例如最易出汗嘅腳趾區，織物結構較為疏落，從而改善透氣效能；鞋頭周圍用上較密嘅織法，韌度高咗，支撐力都強咗，防止前掌過度滑移；鞋身兩側嘅織物彈性高，外面仲有以三間形狀組成嘅支撐片，牢牢穩定腳掌位置。睇得又跑得嘅Ultra Boost，朝早跑步後，晏晝出街都唔使換鞋，計落其實幾抵着喎！

查詢︰2789 8198（旺角豉油街21C adidas Megastore）

2730 0157（尖沙咀漢口道17號adidas旗艦店）

文︰Dick　攝︰Homan（產品）