時尚潮流
  • SR超合金
    鐵甲萬能俠Kurogane Finish
    建議零售價:¥7,000

    正如RX-78元祖高達般,到底SR合金鐵甲萬能俠出過幾多版本?身為合金控嘅筆者真係數唔晒,之前就有為輪島永井豪紀念館而炮製咗幾款改色版,又有大膠懷舊配色等等,最近Bandai就以「SR超合金誕生五周年」為理由,推出咗名為「Kurogane Finish」嘅全新配色版本,黑沙位置由常見嘅光滑表面,變成截然不同嘅磨沙鑄鐵質感,就連盒面都係全新設計,比起單純改改顏色就了事嘅所謂特別版,Kurogane Finish花心機得多。

    全金屬製嘅髖關節,可動性相當高,凌空飛踢夠自然。

    朋友號只得摺疊狀態,小心雙螺旋翼容易折斷。

    胸部、下腹、肩膀嘅黑色外甲表面,變成霧化磨沙嘅「鐵仕上」質感。

    飛翼背包嘅黃色部分改用消光處理,聊添新意。

    幻彩藍加上銀色腿部,顏色分外鮮明。

    關節跟普通版一樣,能夠擺出鐵甲飛拳甫士。

    包裝盒重新設計,印有鐵甲萬能俠嘅側面特寫,表面仲有鍍金燙字,夠Grand!

    今次嘅SR鐵甲萬能俠Kurogane Finish,官方幫佢起咗個新名堂「鐵仕上」,解做「鐵表面處理」咁話,胸部、下腹、肩膀嘅黑色外甲表面,就有類似霧化磨沙嘅細密凹凸手感,官方話似鑄鐵Feel,不過「官圖無限美」,官圖所示打晒燈表面令立立勁有質感,但係開盒拎實物上手,膠感出晒嚟,還好啞面消光處理算唔錯,加上銀色金屬部件,以及幻彩藍色前臂與小腿嘅光澤塗裝,與沉實主體形成反差,展現高貴又獨特嘅形象。

    配件少 腰帶易刮花

    話說「鐵仕上」嘅包裝盒細細個,巴打要瞞住家人「偷運」返屋企都容易啲,不過包裝的骰亦意味Parts唔多,其實從官圖可以一眼睇晒,飛翼背包、腰帶、長劍、造型手掌,就係得咁多,之前普通版都有嘅強化型鐵甲飛拳,或者係未推出過嘅後期型朋友號、肚皮導彈、飛鏢及小型飛彈等武器都依然欠奉,確實仲差啲誠意。還要留意腰部銀色部分可以夾上腰帶,裝拆時夾位容易刮花,玩家記住輕手啲。

    查詢:2433 1828(瑞華行)

    文:Alfred 攝:Homan