樂視雙雄各有各叻

繼樂1 Pro之後，今年4月樂視喺北京發布嘅另外兩部新機樂1及樂Max亦都從水路到港。三部手機中，最備受注目當然要數到樂Max，佢規格最強，坐擁6.33吋巨芒，解像度有2,560×1,440，顯示質素超班；而樂1雖然定位較入門，但5.5吋全高清屏幕及八核心處理器都唔輸蝕，各有賣點！

樂Max備有6.33吋屏幕，條屏幕邊框更只係闊1.6mm；佢預載EUI介面，不設AppDrawer，操作順暢。$4,300（64GB）

支援雙卡雙待，卡槽分別兼容nanoSIM及microSIM。

採用USB Type C充電，原裝提供一個傳統microUSB轉插。

弧形機背，鏡頭下方備有指紋辨識器。

因為屬內地水貨，所以火牛係兩腳插頭，另附送一條microUSB線材。

預載「樂見」戲劇介面，影片種類就夠晒多，不過喺香港全部都睇唔到。

用前置鏡頭配合四級美顏自拍，皮膚即刻白滑晒，效果亦未見太假。

Recent Apps介面經過重新設計，上半部為快捷鍵，下半部為程式切換。

提供柔和、樂視、自然及鮮艷四款顯示色彩，可因應喜好隨時轉換。

樂1都有5.5吋屏幕，不過屏幕邊框就有成2.6mm，唔夠樂Max有型。$2,200（32GB）

樂Max終極大芒

樂視網頁話樂Max係「極限旗艦」，視之為品牌現時最勁手機產品，當然要落足心機。機身方面，樂Max繼續用上一體成型金屬機身，並且由航空鋁合金製造，配合細緻打磨工序，手感相當順滑。屏幕有成6.33吋，屏幕每條邊框只有1.6mm，成個芒佔機面面積達80.3%，但係有代價，就係機身無可否認較龐大，重達204g，分量十足，男士都勉強用到，女士想手持就攰啲喇！值得一提，此機屏幕不但解像度達2,560×1,440，而且係出自Sharp手筆，NTSC色域高達90%，確保可以顯示出正確顏色。

指紋技術加持

至於規格，樂Max採用Qualcomm Snapdragon 810八核心處理器，有4GB RAM，載入遊戲、上網反應都好爽。作為旗艦機，當然唔少得指紋辨識器，樂Max用上TrustZone技術設計指紋解鎖，將用家指紋資料獨立儲存，保障個人資料。指紋辨識器位於機背主鏡頭下，手指輕輕一按隨即就會為手機解鎖，相當易用。美中不足係暫時指紋辨識只可以用嚟解鎖，希望日後可以追加更多指紋認證嘅用法，例如付款。此機支援雙卡雙待，更同時兼容TD-LTE及FDD-LTE兩大4G制式，經常中港兩邊走就一定啱用。而樂視手機主打嘅樂視內容，依舊有地區限制，睇唔到，好可惜！