德甲雙雄衫鬥靚

擾攘多日嘅德甲轉播權終於喜劇收場，無論你幫襯C台或N台，今季都可以齊齊睇德甲，至於箇中兩大班霸—拜仁慕尼黑與多蒙特，首周戰情亦都皆大歡喜，分別以5:0及4:0大炒對手，身為佢哋嘅粉絲，肯定大呼過癮啦！想再盡興啲、投入啲嘅話，又點少得着埋佢哋嘅靚靚新波衫呀！

今季新波衫嘅設計，可謂傳統與創新嘅結合，最抵讚係有齊Replica及ACTV版本，唔再畀阿仙奴威晒。

PUMA多蒙特2015/16主場球衣（ACTV） $1,299（a）

PUMA多蒙特2015/16主場球衣（Replica） $599（a）

PUMA多蒙特2015/16第三作客球衣 $599（a）

ACTV嘅內部，無論正、背面嘅多個位置都加上ACTV膠貼，有助促進血液循環。

出於輕量化需要，ACTV（左）嘅隊徽與上面嘅兩粒星星，由Replica（右）較為厚身嘅熨章變成薄身嘅熨膠。

馬高列奧斯（Marco Reus）續約留會，令蜜蜂兵團嘅球迷對新球季有番希望。

除咗今季首周德甲賽事大炒漢堡5:0，開季前拜仁仲贏埋Audi Cup，得喇得喇，至威係你喇！

adidas拜仁慕尼黑2015/16主場球衣（Climacool）$629（另有adizero版本售$1,099，b）

衫腳嘅鑽石圖案，代表粉絲眾多遍布天下，白色嗰三個仲有球會代表字母「FCB」。

領位背後印有巴伐里亞語「Mia san mia」，意思就係「我哋就係我哋」，霸氣到呢！

拜仁喺德甲25度封王而贏得嘅四星勳章，短期內都好難有第二隊做到。

多蒙特有齊雙版本

先講多蒙特，黃色做主、黑色為輔嘅傳統當然唔改得，細節方面衫腳用黑色包底之餘，衫身正面加咗黑色橫間，領位就由上季嘅圓領變成V領，再加反領襯托，至於兩邊衫袖都有黑色橫色粗邊直落到底，就參考咗1983/84嘅波衫款式，向球會歷史致敬。其實賣相點變唔係重點，最吸引係今季終於有齊Replica球迷版及落場版ACTV，唔似上季淨係有Replica輸港上架，畀同屬PUMA陣營而有齊兩個版本嘅阿仙奴威晒。ACTV唔只喺剪裁上比Replica修身得多，而且顧名思義，衫身內裏布滿ACTV膠貼，作用就好似現時流行嘅運動膠貼，對肌肉發揮穩定與支撐作用，配合修身剪裁，可以幫助血液循環，從而減少肌肉疲勞與受傷嘅機會。如果你真係會着住呢件新波衫踢波，或者身形Top Fit嘅話，梗係揀ACTV；反之自問未有本錢Show肌，又只係平時着嚟行街或者睇波打氣，Replica自然係理性之選。

反傳統拜仁紅到盡

歷史愈耐、獎盃愈多嘅球隊，包袱就愈重，仲好多時反映喺波衫上，成立至今已有115年，期間25次德甲奪冠（其中6個就喺最近10季贏到）、5次歐聯封王嘅拜仁就係好例子，多年以嚟主場出擊都係披上紅戰衣，呢個光榮傳統相信都幾難改，何況今季？不過尊重傳統唔代表冇新意，以往見慣見熟，紅色為主，衫袖加上白色三間條紋嘅配搭，今季變成單色主義，三間條紋都變成紅色，更加突出紅色所代表嘅旺盛戰意。除此之外，衫腳嘅右邊位置設有鑽石形壓花，其中三個白色壓花分別印埋代表球會嘅「FCB」三個字母，據官方資料解釋鑽石形壓花代表咗球會粉絲多達數百萬計、分布全世界，就算筆者唔係拜仁球迷，都不得不承認拜仁喺歐洲球壇確係有領導者地位，喺德甲更加係屈機啦！