喬大落場　實試Super.Fly 4

好多人都知，「喬大」喬靖夫唔只係俠氣縱橫嘅小說家，而且文武雙全，武術與籃球都同樣技藝精湛，不過成功冇僥倖，正如喬大筆下嘅武林高手般，佢嘅一身好本領，都係多年鍛煉積累而成，相信唔少球迷都喺旺角花墟公園籃球場遇過喬大練波，你又知唔知喬大最鍾意着邊款鞋打街場？答案並非星味滿瀉嘅Signature Shoe，而係勝在平衡度高，Blake Griffin選用多時嘅Jordan Super.Fly系列；唔經唔覺，Super.Fly啱啱出到第四代，又能否繼續成為喬大最愛呢？

就算今代Super.Fly沿用前掌Zoom Air布局，但經過多次跳射練習之後，喬大認為緩震方面依然夠用，即使未能試真Flightspeed嘅潛力，但起碼唔會比Flightplate遜色。

雖然今次測試嘅Super.Fly 4 ”Marvin The Martian”，外底並非XDR版本，但係喬大實試過後，認為佢嘅抓地力喺街場上依然好夠用。

雖然喬大常常笑稱自己係「老兵」，但係筆者睇過幾次喬大打波，論身形、噸位，的確唔係喬大嘅強項，但係基本功嘅純熟程度、走位嘅靈活性以至投籃嘅準繩度，真係叻過唔少後生仔，甚至體能與速度都贏埋，係勤力練波o既成果。

Jordan Super.Fly 4”Marvin The Martian”$1,299

今代Super.Fly用番Mesh鞋面，理想嘅柔軟度令喬大一試愛上。

鞋底採用前後分割式布局，留意前掌有三個凸起嘅地方，正係三塊Zoom Air嘅藏身位置。

今代Super.Fly嘅中底由Flightplate升級為Flightspeed，據廠方資料表示，此舉可以進一步發揮Zoom Air反應快嘅特點，令用家起步、起跳更快更有效率。

喬大有幾愛Super.Fly系列？睇睇佢嘅Instagram就知，Air Jordan、LeBron、Kobe、Kyrie 1、KD、Melo、CP3等等鞋款佢都着過，但係Post得最密、留言最長嘅鞋款，始終係Super.Fly，喬大坦言︰「我一向都有着開Super.Fly系列，由第二代開始，亦係我最鍾意嗰款，佢嘅鞋身用Mesh物料製成，質地比較軟身；第三代改用Fuse物料，感覺硬咗啲，反而冇咁舒服。」早前Super.Fly 4抵港上架，得知連忠粉喬大都未試過，於是筆者相約佢到旺角嘅花墟公園籃球場試鞋，睇睇Super.Fly 4到底係青出於藍，或是新不如舊？

Mesh回歸　舒服返晒嚟

今次測試用咗一個鐘頭多啲，走籃、跳射、運球、插花同埋1 on 1防守等等動作都有做，務求盡量試出Super.Fly 4嘅真功夫；同第二及第三代相比，喬大又點樣評價新一代，他認為︰「Super.Fly嚟到第四代，鞋面用番Mesh物料，好鍾意、好舒服，一着上腳已經打得波，唔使Break in，同埋鞋身比較軟，索緊鞋帶之後，好容易就包實對腳。至於鞋底嘅抓地力，喺呢個比較污糟嘅街場試過之後，效果非常好，基本上所有急停、後跳都做得好稱心。至於避震，我一向都係Flightplate嘅擁躉，呢個設計用過喺Super.Fly及AJ XX9身上，我都好鍾意；今代Super.Fly改用Flightspeed，我仲未察覺到同Flightplate有幾大分別，可能要打多幾場波先知，但係一路以嚟我都好鍾意Flightplate，佢嘅起步能力及力量回饋都造得好好。」

前掌Zoom Air　絕對勝任

除咗Flightplate/Flightspeed，Zoom Air係Super.Fly系列嘅另一緩震要素，不過由以前到依家，Zoom Air都只係局限喺前掌，其實夠唔夠用？喬大以個人經驗分析︰「我嘅身裁比較瘦削，對後踭嘅緩震要求唔係太大，我一直以嚟着Super.Fly系列，都冇後踭痛楚嘅問題，其實AJ XX9嘅後踭都係冇Air Bag，況且我呢類比較輕磅嘅球員，唔會有太多籃底嘅打法，亦都比較少直上直落衝籃板，後踭落地嘅機會比較少，所以唔覺有咩問題。」咁講法，重磅球員同Super.Fly好難夾？喬大補充說︰「Blake Griffin着咗Super.Fly咁耐都頂得住嘅話，冇理由對我哋亞洲人嚟講會頂唔順，佢有成200幾磅喎，有好勁嘅爆炸力及跳躍力，佢落地都頂得順，所以我相信唔會有好大問題。」