Honda Odyssey 瓣瓣都達標

賣相要夠型，最好可以載多啲人，但係車廂又唔可以逼，隨車設備愈多愈好，耗油唔好「大食」？以上要求好奄尖、好貪心？早前筆者試咗三日嘅本田（Honda）Odyssey，都統統達標喎，舒舒服服坐足七人不特止，185ps馬力加上油費可以低至$1.2/km，而且呢排日圓匯價偏低，車價$468,880，夫復何求？

啟動ECON Mode節能模式，就可進一步減少耗油量。

智能泊車輔助系統已屬標準裝備，以後泊S位或L位都唔再有難度。

軚環右後方有Carmea掣，按下即可啟動360度鳥瞰鍵，即時從屏幕掌握車外四周情況。

多功能真皮軚環，握感實在，扭軚特別好Feel。

中排用咗兩張OTTOMAN大班椅，乘坐感受十分舒適。

後排座椅去咗邊？完全收埋喺地台底下，車尾變成置物大平台。

腿墊備有多段斜度調校，夠體貼。

中排椅背連埋頭枕位置，都可自行調校斜度，對應唔同乘客嘅坐姿要求。

想喺中間開條走廊？只需將中排座椅向外拉出移位即可。

睇真啲後排空間絕非Dog Seat，腿部空間又夠充裕，大人坐都OK。

1,695mm嘅車身高度，唔再受停車場嘅高度受限，泊車夠方便。

揸開箱形MPV嘅車迷都知，唔少商場停車場都有1.8m高度限制，咪話唔頭痕，全新Odyssey就冇呢個煩惱，車身高度只有1,695mm，唔怕再「頂頭」。至於車廂布局融入「空間最大化，機械最少化」嘅設計理念，前中後排都有充足嘅乘坐空間，尤其是中排Ottoman座椅，由椅背、腿墊，以至整張座椅都可獨立調校，充分承托身體每個部分，座椅位置又可以向外拉開，即可騰出走廊空間；後排可以輕易收起，變成平整地台增加儲物空間。隨車又有雙電動趟門，輕拉手柄就會自動打開，加上300mm離地距嘅低地台，長者、小孩進出車廂都夠方便。

泊車唔使再扭軚

畢竟係MPV，Odyssey嘅車身體積有番咁上下大，如果只靠望鏡，泊車、睇位始終有難度，多得360度鳥瞰系統、多角度泊車鏡頭，加埋後泊警示器幫手就唔同晒，車身四周情況Show晒畀你睇，唔使靠估，放心晒，操作好簡單，只需一按軚環右後方操控桿嘅按鍵，就可透過中控台嘅七吋輕觸屏幕，睇到車頭前方及360度嘅即時鳥瞰圖像。除此之外，隨車備有智能泊車輔助系統，啟動後，無論泊S位或L位，只需配合系統指示，輕踩迫力控制前進或倒車，毋須握軚，甚至可以翹埋雙手，Odyssey就會自動扭入泊位，絕對是駕駛新手嘅恩物。

滿載上斜冇難度

今天試車行咗大約230km，平均耗油量只有8.1L/100km，以目前油價計算，只係$1.2/km左右，以MPV嚟講，絕對算得上係慳家一族，皆因2.4L i-VTEC引擎導入咗缸內直接噴注燃油系統，配合七前速CVT無段變速波箱，馬力與扭力分別達185ps及24.0kgm。引擎中低轉扭力充沛，起步爽快又富線性，走上馬鞍山繞道長長嘅上斜路段，都做到從容不迫、有心有力；之後去到大埔公路（大埔滘段）嘅連續彎路，循迹表現不俗，未有因為高速入彎而令車身出現大幅度傾側。加上擺動分析導向系統、車身穩定輔助系統及電子轉向等系統輔助，按車速及轉向角度計算並作出修正，增加行車穩定性，一字記之曰︰定！