無邊Xperia C5 Ultra Dual自拍夠Wide

香港人自拍成癮，行到邊影到邊，無時無刻要把靚樣記錄在案，所以一眾自拍神器多年來都有價有市。近來Sony Mobile又有新神器推出，這部Xperia C5 Ultra Dual坐擁6吋無邊巨芒，睇相已夠晒靚，仲內置埋13MP前置廣角鏡頭及LED補光燈，自拍又Wide又自然。最重要是售價只係三千幾，比其他神器抵玩得多！

機身甚具日系風格，並預載Android 5.0智能系統。$3,298

屏幕邊框幼過牙籤，三部拍埋幾近無邊，視野勁闊！

前置13MP鏡頭及LED補光燈，與主鏡頭同一級數。

支援4G雙卡雙待，可插兩張nanoSIM。

備有白、黑及閃銀綠三色，後者為手機中少見，勁搶眼！

Stamina模式在熄芒時暫停背景程式，延長待機時間。

設「單手操作」Mode，可把畫面縮少至4吋或5吋大，照顧手細女孩子需要！

《AnTuTu》跑分有46,118，與Note 4相若，表現對辦。

「AR面具」模式把動物面孔合成到自拍照上，效果爆趣！

美顏模式當然唔少得，並有美白、柔膚、古銅等多種玩法。

另有「AR趣拍」，將虛擬物件加入實景內，好玩！

試相：室內自拍，鏡頭夠Wide未見變形，同時閃燈柔和，Model膚色自然。

同期推出的還有防水M系新成員M5 Dual，它支援IP65/68防水防塵，並對應Hybrid AF快速混合式自動對焦系統，對焦速度快達0.25秒，能輕易捕捉瞬間景物。$3,698（將於9月發售）

6吋幼框巨芒

一部手機能升格成為神器，除了要有過人拍攝能力外，個Look都好重要。「嘩嘩嘩！」係同行女記者見到C5 Ultra Dual第一個反應，皆因機身堅靚。一體成型的它，正背面都有玻璃面加持，四周則以鋁合金製造，加上備有黑、白及閃銀綠三色，撞色得來貫徹廠方的日系簡約風格。屏幕夠大亦是亮點，達到6吋之巨，兩邊更用了近乎無邊框設計，令畫面輸出分外廣闊。此芒解像度雖未達2K質素，但IPS技術下可視角度高，肉眼睇非常精細，睇片亦順暢；美中不足是顏色偏淡，睇慣味精芒的用戶未必鍾意。

超廣角自拍鏡

Sony手機拍攝像素一向高，此機更誇張，直接把主鏡頭規格移植到前置鏡頭，像素高達1,300萬，配合Exmor RS影像感測器，自拍質素大大提升。有別於一般手機只能用現場光自拍，此機加入前置LED補光燈，可在低光或背光時保持影像清晰自然。而為配合群拍熱潮，鏡頭還支援22mm超廣角，取景角度達到88度，莫說Selfie，Usie都難佢唔倒！模式方面，美顏、HDR、全景、畫中畫等只算例牌菜，最盞鬼係AR面具功能，可把朋友或動物的面孔合成到自拍照上，效果十個趣！

超長續航力

雖然C5 Ultra Dual定位中階，但硬件唔弱，處理器及記憶體分別達到1.7GHz八核心及2GB，操作流暢未見窒，對焦及存相亦見爽快；《AnTuTu》測試更跑出46,118高分，表現對辦。一如同系手機，它也支援中港4G雙卡雙待，而且兩張nanoSIM槽皆對應4G，進入系統就能更換SIM卡名稱及網絡制式，方便！作為神器，電量亦係一大考量點，此方面其電容積有2,930mAh，雖然不算多，但續航力足夠應付7小時47分鐘視頻播放，相信齋影相絕對不止此數；留意Stamina省電模式能在熄芒時暫停背景程式，進一步延長待機時間，保證有排影！