家陣消費付款方法多多，除咗畀現金、EPS、碌卡、嘟八達通之外，其實科技界、財經界人士老早經已預視，用手機磅水都得！流動付款（Mobile Payment）將會係未來大趨勢，手機廠商如Apple、Samsung已宣布進軍流動付款市場，不過暫時仲未登陸香港；點知轉個頭本地電訊商SmarTone同HKT就齊齊推出流動付款平台，爭飲頭啖湯。究竟點用呢？係咪夠方便呢？即刻幫大家拆解！

商戶支援Master Card Paypass的話，亦即代表Tap & Go都啱用。
網址：www.tapngo.com.hk

HKT Payment Limited產品開發、業務發展及卡務營運高級副總裁管紀東表示：「未來將會增加更多增值點，而且亦會推出iPhone流動付款的解決方案。」

Tap & Go提供「拍還拍」功能，可以遙距轉帳及即拍即付。前者只要輸入對方電話號碼即可，而後者就需要兩部手機以NFC晶片拍機進行。

「拍還拍」功能可以將金錢轉送至其他帳戶，以後AA制食飯就算冇現金都可以即時夾錢。

Tap & Go支援「Always-On」功能，唔使事先着芒開App都照樣可以完成付款過程。

一按主頁Tap & Go卡圖示，就會即時顯示帳戶餘額。

每次交易設有30秒時限，逾時就要重新再進行付款程序。

可以暫時停止帳戶內信用卡嘅網上付款功能，對用家更有保障。

KISS付款過程使用超聲波技術，iPhone和Android手機都用到。
網址：kissco.com

KISS應用程式主頁會顯示一系列參與商戶，亦會提供不同優惠。

暫時KISS帳戶只可連結至銀聯信用卡直接消費，Visa及Master信用卡係用嚟增值。

增值金額暫時設限，僅提供$300、$500或$1,000。

同樣可以將帳戶內金錢轉帳至其他用家，仲會即時顯示交易記錄。

購物過程同一般店舖一樣，嘟完貨品之後，收銀機畫面就會顯示付款方式，揀選KISS就得。

商戶可於店內擺放KISS Beacons，客人以手機一拍即可獲得不同類型嘅訊息。

用家要喺手機打開KISS應用程式，進入「付款」，仲一定要透過Touch ID或PIN碼認證。

將手機放上感應器，大約兩秒即完成交易。

暫時美國支援Apple Pay嘅商戶都唔少，當中不乏Foot Locker、Macy’s、Nike、Sephora、Best Buy等大公司。

Visa、Master甚至American Express三大信用卡發卡機構都支援，仲有一大堆銀行嘅扣帳卡都啱用。

Samsung Pay支援採用MST技術嘅磁卡，傳統信用卡都用到。

據講下一部Samsung旗艦機會加入Samsung Pay功能，咁傳聞中嘅Galaxy Note 5咪呼聲甚高？

香港資訊科技商會榮譽會長方保僑

Tap & Go

即拍即畀

HKT推出嘅流動付款服務叫「Tap & Go」，中文就稱為「拍住賞」。原理好簡單，佢係用備有NFC智能晶片嘅SIM卡配合專用嘅「拍住賞」電子錢包App，咁就可以透過手機於指定商戶嘅讀卡機一拍付款，用法同現有八達通卡一樣，成個過程最快三秒就完成，相當方便。呢個Tap & Go服務查實同MasterCard PayPass方式一樣，所以支援嘅商戶正正就係提供MasterCard PayPass嘅舖頭，亦即是代表全港就有超過六千間商戶用到，衣食住行等類別都有，包括周街都係嘅Circle K、7-Eleven、Starbucks、Pacific Coffee、759阿信屋、萬寧、Pizza Hut，就連一田百貨都得。

預先增值

只要大家係1010、CSL嘅用戶，事先落門市進行簡單登記，並免費換張新SIM卡，之後喺手機下載《Tap & Go》App，根據指示啟動帳戶就用得。登記過程五分鐘內完成，而且申請毋須費用，所以開咗唔用都冇咩損失。Tap & Go服務其實係以預付形式進行，所以要為帳戶預先增值，用家可以揀去1010、CSL及HKT門市以現金入錢，每次最多入$3,000，又或者用大新信用卡增值，每次最多$10,000，而每項交易亦限咗喺$1,000或以下，主打小額交易。小記試用過，手機即拍付款，確實夠方便，手機喺手，忘記帶信用卡同Cash出街都買到嘢；唯一問題就係冇大新信用卡的話，要用現金去門市增值，如果遲啲可以有更多嘅增值地點就好喇。

KISS

綜合平台

另一邊廂，SmarTone唔單止玩流動付款，佢哋新推出嘅KISS服務，聲言係市場推廣及銷售平台。呢個平台分為商戶同埋客戶兩部分，商戶首先要將POS（Point of Sale）系統連接到KISS嘅商戶終端機，之後就可以接受使用KISS及KISS Pay嘅客人。用家只須於指定智能手機上開啟《KISS》應用程式，再揀選「付費」一欄，再將手機擺喺收銀機感應器，大約兩秒即完成交易。勁在KISS嘅付款過程係採用超聲波技術，Android機用到，就連iPhone都得，全民啱用！另外，每次進入KISS Wallet介面時，都一定要用指紋Touch ID或PIN碼解鎖，保安程度都算唔錯；而萬一冇流動數據網絡覆蓋時，透過Wi-Fi網絡都依然可以完成付款程序。

互動KISS Beacons

唔同Tap & Go，KISS帳戶嘅增值方法一律係信用卡，可以用Visa、Master卡為帳戶增值$300、$500或$1,000。如果你有銀聯卡，仲可以用KISS帳戶連結口直接消費，唔使成日增值咁麻煩。KISS平台最大特點就係商戶可經由KISS嘅應用程式進行宣傳、向指定客戶發送優惠訊息及提供KISS Dollar獎賞等，其中最吸引當然就係KISS Dollar，因為可以喺購物時當現金直接扣減，又可以喺消費時賺返嚟。此外，商戶仲可以喺店內擺放KISS Beacons嘅感應裝置，客人同樣以手機一拍，即會出現由商戶自訂嘅內容，好似歡迎語句、產品資料或者提供KISS Dollar等，可以同客人多啲互動。不過KISS平台仲未有確實嘅推出日期，據講參與嘅商戶都會提供1%至15%嘅折扣優惠，相信對消費者有一定吸引力。

外國先例

Apple Pay　美英先行

可以話為呢場「流動付款」大戰揭開戰幕嘅Apple Pay，上年9月正式發布，10月美國登場；上個月亦於英國正式推出。Apple Pay都係採用NFC技術，再配合Touch ID認證嘅付款方法，門市、網購都同樣用得着。用家只要預先將信用卡或者扣帳卡資料輸入至Passbook，再去到支援Apple Pay嘅商舖，手指印一印Touch ID就隨即完成付款。最大優勢當然就係支援嘅商店全美國有22萬間，加上數量龐大嘅果粉，普及速度自然夠快。

Samsung Pay　兼容磁卡

對頭陣營玩ePayment，Samsung當然都唔執輸。一般流動付款都淨係支援非接觸式嘅晶片卡，但呢類卡嘅普及程度一定冇傳統磁卡咁犀利。Samsung Pay除咗支援NFC技術外，仲兼容磁卡所用嘅MST（Magnetic Stripe Transmission）技術，可以將磁卡資料轉移至Samsung Pay，再以無線傳送到商戶嘅讀卡器。正因為只需一般信用卡讀卡器，所以兼容度極高，據報全球超過3,000萬個商戶，大約90%嘅POS系統都啱用。

達人點睇

香港資訊科技商會榮譽會長方保僑表示，流動付款可能喺2016、2017年就會普及。佢認為：「估計Apple Pay、Samsung Pay遲早都會嚟到香港，依家電訊商嘅動作，就令用家預早習慣呢種新嘅付款模式，日後交接上來亦會較容易。其實流動付款都屬於電子商貿嘅一部分，當然愈早入場愈有利。我認為本地電訊商亦會有暫時性嘅優勢，因為已經有商戶採用呢種流動付款方式。」

文：Vincent　攝（部分）：Man　模特兒：Ayavi（Zmodel）