自從莫連奴喺2013/14回歸車路士，藍軍又再成為英超冠軍嘅頂頭大熱，果然，車仔唔只喺上季封王，而且提早三輪賽事捧盃，實在贏得漂亮，今季英超，甚至歐聯會否都畀佢染藍呢？

車路士2015/16
Climacool主場波衫
$629
（另有adizero版本售$1,099）（a）

衫腳位置有指模與吉祥物圖案，將球迷與球會連繫埋一齊。

看似圓領設計，其實暗藏啪鈕，無形中加大咗領口位置，大頭一族都容易着上。

隊徽圖案不變，不過主客有別，主場波衫用上彩色設計，作客就改為藍、白雙色。

車路士2015/16 Climacool
作客波衫　$629（a）

車路士Techfit下衣
$299（a）

車路士Techfit短褲
$259（a）

利物浦2015/16作客波衫　$579（b）

設計主調簡潔，但仍不乏有意思嘅細節位，例如領位背後繡上「96」與火炬，紀念希斯堡慘劇嘅96位死難者；衫身背後底部嘅紅色三角形，就有「Liverpool FC」嘅字樣。

今季利物浦引入唔少勁人，就以開季前嘅熱身賽為例，就以由曼城來投嘅占士米拿表現最標青。

史篤城2015/16主場波衫
$579（b）

史篤城2015/16作客波衫
$579（b）

領位背後繡上「The Potters」字樣，正係史篤城支持者嘅暱稱。

其實上季英超季尾階段，史篤城已經率先換上New Balance嘅新波衫，代表作係主場大勝利物浦6:1。

車路士 指紋凝聚向心力

其實唔只英超冠軍，但凡一切錦標，對車仔全隊上下嚟講都好想要，正如佢哋新波衫嘅宣傳口號︰「If it's not blue, it will be」可見今季嘅車路士，直頭Hunger for Victory，呢份決心完全表達於新主場波衫之上。新衫成件都以藍色為主，至於同樣代表車路士嘅紅、白雙色，就以條紋形態出現於領位及袖口上，仲有衫身正面嘅直間暗紋，亦係最近30年嚟嘅常用設計。新波衫既有傳統筆觸，亦有耳目一新之處，最明顯當然係心口嘅贊助商由Samsung變成Yokohama Tyres，除此之外，原來領口暗藏啪鈕，最有意思係衫腳印有指模圖案，底下就係代表球會嘅獅子標誌；指模係最個人化嘅象徵，將指模與球會吉祥物擺埋一齊，就將球迷與球會之間嘅關係變得更緊密。

利物浦 作客白衣好兆頭

相比於拜仁喺德甲獨大、西甲已經變成巴塞與皇馬嘅寡頭馬車，英超好睇之處就係有競爭，被視為冠軍熱門嘅，至少有車路士、曼城、曼聯、阿仙奴以及利物浦五隊，當中就以利物浦嘅人腳變化最大，唔只重錘買入前鋒賓迪基，又有占士米拿及羅拔圖法明奴等好波之人加盟，就連波衫贊助商都換成New Balance，一番新氣象之下，紅軍又可會扭轉宿命，喺今季實現英超第一冠嘅夢想呢？之前介紹過主場及黑色作客波衫後，另一款白色嘅作客波衫亦已抵港上架，設計簡潔醒目，領位、袖口、商標及隊徽用上主場嘅紅色，與主色形成鮮明對比。睇番紅軍18次贏到本土頂級聯賽冠軍嘅年份，當中有13季嘅作客波衫都係白色，得勝率甚高，會否成為今季衝冠嘅好兆頭？

史篤城 鬥心獲青睞

英超以高競爭性見稱，今季只怕鬥得更激烈，除咗前文提及嘅上游球隊，多支中游球隊今季都大事擴軍，就以史篤城為例，看似「其貌不揚」，但係自從2008年升上英超開始，每季總成績從未跌入降班區，對上兩季更加厲害，連續穩坐第9名，今季開咧前仲大手簽入祖斯盧辛馬田、禾爾舒捷特及阿費利等勁人，劍指下季歐洲賽資格嘅決心，路人皆見。如此雄心，與強勢重返綠茵場嘅New Balance可謂惺惺相惜，今季嘅史篤城波衫就改投New Balance陣營，紅白直間嘅主場傳統當然要保留，最有親切感嘅細節位，必然係領位背後嘅「The Potters」（陶工）字樣，事關史篤城係英國最著名嘅陶瓷生產地區，連帶球迷亦被暱稱為「The Potters」，且看陶工們今季能否修成正果，躋身頭六名穩奪歐洲賽門票？

查詢︰（a）2317 1686（旺角朗豪坊7樓L701號舖Futbol Trend）　2527 0217（旺角通菜街63-65號地下adidas Football Store）　（b）2338 0320（中環德己立街業豐大廈New Balance）

文︰Dick　攝：Chun、Man（產品）