除了柴米油鹽外，逛美食博覽，月餅是必掃Item。今年場內以「好打耳」的卡通月餅最多新產品出籠。品牌如美心、東海堂以迪士尼的小熊維尼、小女孩最愛的Elsa，還有本地創作的聾貓，以及誕生60周年的Miffy當主角；想找Hello Kitty、Litttle Twin Stars及My Melody，可幫襯全港獨一無二家的山下菓子玲瓏月餅。打耳月餅以外，以水果作餡、做法傳統、Sell矜貴的，同樣各有賣點，不妨帶多幾個購物袋去掃貨。

東海堂Miffy冰皮月餅「冰雪之月」
$ 208/1盒4個
珍珠白鐵盒，盒上印有Miffy大頭浮雕，內藏牛乳芝士及牛乳朱古力口味的冰皮月餅，萌爆登場！牛乳芝士富濃濃芝士香，牛乳朱古力則較溫和，不會太甜膩。
攤位編號：1C-C02

美心Tsum Tsum幻雪冰皮月餅+繽紛奶黃月餅 $178/套
小熊維尼奶黃月餅經雙重烘焗，奶黃香濃，入口不膩，加熱品嘗，味道更佳，絕無添加人造色素，最啱小朋友。

山下菓子My Melody、Little Twin Stars、Hello Kitty系列玲瓏月餅 $180/2盒
專為OL及小朋友而設計，推出Hello Kitty雙重朱古力、Little Twin Stars紅豆綠茶、My Melody藍莓，細細件，方便品嘗。

萌爆卡通人物

今年美心首次推出兩款大熱的Tsum Tsum冰皮月餅及奶黃月餅，並以Elsa及小熊維尼做主角，賣相可愛。品牌同時又與潮牌：CHOCOOLATE及插畫家小克合作，推出環保包裝的小克環保月餅禮盒，由Cutie又潮爆的聾貓擔大旗。東海堂就趁Miffy誕生60周年，推出Miffy 60周年紀念「冰雪之月」冰皮月餅。至於走和風路線的山下菓子亦有3款卡通月餅，包括Hello Kitty、Litttle Twin Stars及My Melody，小朋友一定愛不釋手。

香甜水果乜乜乜

喜歡吃冰皮月餅的，今年場內有不少新選擇，像大班就推出全新「冰皮迷你3S系列月餅」及多款全新水果口味。醉榴香則有多款貓山皇榴槤月餅，到場朋友更可以$1玩遊戲，贏取一世免費吃月餅的大禮。

傳統中的突破

送禮給老人家、長輩，傳統月餅必不可少。榮華就以全新白色高貴鐵盒，盛載粒粒蛋黃低糖白蓮蓉月餅，低糖月餅更健康，啱晒老人家口味。樂茶軒則首度推出Hello Kitty月餅，以白蓮蓉、喜馬拉雅山健康岩鹽作餡，清新健康。至於奇華就有全新伯爵茶奶皇月餅，茶味濃郁，是喜愛奶黃月餅的朋友的新選擇。

最豪威士忌月餅

多得日本威士忌品牌余市宣布部分威士忌停產，凡與日本威士忌的有關產品，近來都被熱烈追捧。今年鴻星順應民意，推出全港首創「鴻星．竹鶴威士忌月餅」，讓一眾搶不到日產威士忌的劉伶止止渴。此月餅以「竹鶴威士忌Pure Malt」及朱古力做餡料，夠豪夠矜貴！此月餅限量600套，會場首發每日限定10套，每套$998，送禮自奉皆宜。

文：Kiwi　攝：Man、Homan、Kent