終於等到八月，各大歐洲聯賽紛紛開鑼，球迷唔使再捱餓波之苦了，星光熠熠、地上最強嘅西甲將於本月22日揭幕，當中最具星味、最具冠軍相嘅隊伍，除咗巴塞隆拿與皇家馬德里，仲有第三隊咩？睇番2015/16嘅西甲賽程表，雖然呢兩支星級球隊最快都要11月8日先會碰頭，不過喺球場以外已經打起前哨戰，筆者所講嘅並唔係熱身賽、友誼賽，而係波衫界嘅大對戰！

巴塞隆拿2015/16 Stadium主場波衫 $599（另有Match Home版本售　$999）（a）

主客球衣嘅衣領裏面，都印有球會座右銘「Mes Que Un Club」。

巴塞隆拿2015/16 Stadium作客波衫 $599（a）

作客波衫背後嘅紅黃直間，正係加泰隆尼亞區旗嘅象徵。

皇家馬德里2015/16 adizero主場波衫 $1,099（另有Climacool版本售 $629）（b）

皇家馬德里2015/16 Climacool作客波衫 $629（b）

巴塞反傳統 主場直變橫

每逢球季開鑼前，各大球會嘅新波衫早已上架開售吸納人氣，巴塞、皇馬又點會例外。先講巴塞嘅2015/16主場新波衫，用色不變，繼續以藍色及深紅色間紋為主，不過整體形象截然不同，事關沿用多年嘅直間變成橫間；原來藍紅橫間嘅波衫設計，巴塞嘅籃球隊及欖球隊等早已採用，不過用喺足球隊之上，就係球會成立115年以嚟嘅第一次，至於衣領上嘅紅黃相間，正是加泰隆尼亞旗幟嘅象徵。作客波衫嘅加泰隆尼亞色彩更加濃厚，以黃色為主之餘，波衫背面仲有紅黃直間，搶眼程度絕對唔會輸畀主場款式。除此之外，主、客波衫嘅衣領裏面印有加泰隆尼亞語「Mes Que Un Club」，意思就係「點只係一間球會」，顯示巴塞喺加泰隆尼亞地區嘅重要性，並不局限於體育界。

簡潔皇馬 劍指所有錦標

宿敵皇馬嘅新波衫，設計風格截然不同，大玩簡潔美學。先以主場款式為例，白色傳統當然唔改得，不過兩邊衫袖嘅三間條紋，就由以往嘅深色變成銀灰色，設計原意係將新波衫化為一張白淨嘅畫布，寓意球會上下唔會眷戀往昔嘅光輝歲月，而係全力爭取未來嘅一切錦標。另一方面，今屆嘅adidas球會波衫大玩層次感，袖口及衫腳都用上雙層Layer，皇馬主場就用上絹面設計，與白色協調一致之餘，絹面嘅光澤感亦可增添貴氣。作客波衫就以淺灰色為主，品牌稱之為「Silver Glory」，展現馬德里嘅城市美學，至於用料上比常見嘅尼龍或聚酯聚維輕柔得多，與純棉相當接近，帶嚟純棉般柔軟、自然嘅穿着感受外，亦兼顧主流波衫物料嘅透氣性及排汗能力。正如巴塞一樣，皇馬主客波衫嘅衣領裏面都印有字句，皇馬版本係「hala madrid y nada mas」，意思係「拋開一切，馬德里勇敢上前」，鼓舞球員以至球迷提高戰意。

查詢：（a）2388 3348（旺角花園街Nike Football）、（b）2317 1686（旺角朗豪坊7樓L701號舖Futbol Trend）、2527 0217（旺角通菜街63-65號地下adidas Football Store）

文︰Dick

攝︰Bowie（產品）