香脆多士盒榴槤飄香

假如你無分早午晚分分鐘都想吃甜品，在九龍城新開的Cafe Oslo幫到你！不少甜品店入夜才開業，但Oslo卻在中午12時已為人民服務。餐廳提供賣相精緻的多士盒，吸引愛拍甜品呃Like的食客，包括榴槤多士盒、法式杏仁餅多士盒，當中秘製的榴槤多士盒，榴槤味香濃，大人細路都大讚！

（左至右）Josh、Kim、Adian和Philex相當合拍，四子互補長短，一起上班、一起休息，感情比親人更深。

榴槤多士盒 $118
5吋高的多士盒放入焗爐焗7分鐘至香脆，內裏填滿榴槤忌廉、榴槤雪糕、藍莓、紅桑子、糖絲、香蕉乾，猶如披雪小屋。榴槤味濃郁，粉絲必食！

玉子野菌煙肉卷 $68
令人想起懶洋洋的梳乎蛋。香脆的煙肉包着半熟雞蛋，裏面是西蘭花、紅蘿蔔粒，入口清新，正好減低雞蛋的飽滯感。

曲奇奶昔、士多啤梨奶昔各$58
曲奇奶昔以Oreo餅乾加雲呢拿雪糕打勻，再加入牛奶和碎冰，由於沒有另加糖漿，味道不會太甜。士多啤梨奶昔則以士多啤梨雪糕、牛奶、糖漿、冰打成，口感細滑，更有片片果肉添口感。

迷城漢堡包 $68
漢堡包熱辣辣上枱，足有4吋高，夠晒巨型，女士們想一啖放入口？相信會有難度。漢堡用巴西免治牛肉加上洋葱粒打成漢堡扒，配上芝士、番茄、生菜，新鮮Juicy。

蒜香雞翼 $38
蒜香味濃，炸粉不太厚，以醃料醃足一日一夜，吃一口，相當入味。一碟5隻，轉眼就被餓鬼們吃掉。

法式杏仁餅多士盒 $148
喜歡影相呃Like的女生，最愛這款法式杏仁餅口味。賣相七彩繽紛，有齊士多啤梨、朱古力、綠茶、藍莓，加上新鮮奇異果、士多啤梨及杧果雪糕，大滿足！

餐廳分前後兩部分，全店約有40個座位，座位寬敞，環境舒適。

老闆之一Josh喜愛旅遊，嚮往到Oslo奧斯陸旅遊，故小店亦以此命名，希望為客人帶來置身在外地的休閒感。

Oslo由4位平均只有26歲的年輕人開設，4人於中學時代已立下志願，長大後一起開食店。中學畢業後各自到不同的餐廳打拚，過去10年間，他們學盡日菜、中菜、甜品，甚至沖咖啡，早前終於願望達成，於九龍城合作開店。四子性格各異，文靜的Kim和Adian負責下廚，外向的Philex和Josh則負責樓面，各展所長，為客人帶來自創的新奇小食。據說餐廳每逢周末期間都忙得不可開交，最瘋狂的一次，由中午12點一直營業到凌晨3點，期間門外人龍不絕，直至全店食物賣光，客人才肯離去。

創新榴槤溝忌廉

為求突破，四位老闆合力創作出坊間少見的榴槤多士盒，他們的秘製榴槤忌廉，特選泰國金枕頭果肉與鮮忌廉攪拌而成，配搭多士同吃，零舍滋味。多士盒上，還放有榴槤雪糕、香蕉脆片、糖絲等，試過的客人都大讚榴槤味夠濃，比一般榴槤甜品更勝一籌，滿足一眾重口味榴槤友喜好。不嗜榴槤的，還有石板街多士盒、特濃朱古力心太軟、士多啤梨千層酥等供選擇，同樣樣靚味香甜。

炸物小食夠過癮

必食甜品外，店子供應的炸物、小食亦值得你預留一點胃納去收容，食物的賣相和多士盒一樣夠晒過癮，其中玉子野菌煙肉卷上的半熟雞蛋，似足現時勁Hit、懶洋洋的梳乎蛋，據說主理炸物的Kim還特意加入西蘭花、紅蘿蔔粒，令煙肉卷入口更清新。另一款被客人狂捧的小食是蒜香雞翼，醃上一日一夜，夠入味，炸至金黃香脆奉客，啖啖惹味香口，令人想不斷添食。