對撼歐洲車　Infiniti Q70S 3.7

本港行政豪華轎車競爭激烈，儘管「慣性收視」傾向歐系車款，但係都唔可以忽略近年冒起甚快嘅Infiniti，例如Facelift過後嘅Q70，就係一款可與傳統歐洲強敵正面交鋒的日系名車，尤其今次測試嘅旗艦型號Q70S 3.7，馬力高達320hp，而且豪華與安全設備都極為齊全，足以同歐洲名門分庭抗禮。

唔只性能與車廂布局走高格路線，車身賣相亦貴氣與動感並重，不比歐洲豪門遜色。

車頂設有電動天窗，並且附設太陽檔。

軸距長達2,900mm，後排Leg-room自然可觀過人。

錶板採用簡約風格布局，行車資訊一目了然。

原廠用上20吋輪圈，輪胎尺碼為245/40 R20。

車廂設計走豪華路線，設備亦非常齊全。

Q70S 3.7配備BOSE 5.1聲道音響，前排肩膀位置整合咗小型喇叭。

軚環後方設有加減波撥片，轉波輕鬆就手。

由四個鏡頭拍攝嘅車身周邊影像，喺中控台嘅8吋輕觸式屏幕清晰顯示。

波箱屬於七前速規格，仲有自動補油功能。

3.7L V6引擎可輸出320hp馬力，仲有線性嘅加速表現。

繼今年初推出Q70 2.5後，頂級版嘅Q70S 3.7亦已抵港，除咗性能大幅飆升，仲加埋跑格包圍及運動化懸掛，加埋原廠將BOSE 5.1聲道音響列為標準設備，無論駕與乘，置身其中都係極致享受。Q70 Facelift嘅外觀設計採用新款家族式面譜，除咗鬼面罩加上電鍍框邊，仲換埋新款頭燈及日間行車燈，配合20吋輪圈、接近2,900mm嘅長軸距，加埋短前懸，相對於Q70 2.5，Q70S 3.7不但更顯動感，亦更有豪車風範。

內建9.3GB音樂庫

貴為旗艦版本，豪華設備當然唔會少，例如BOSE音響升級至5.1聲道，喇叭數目由Q70 2.5嘅10個增加至16個，一對前座嘅膊位又整合埋小型喇叭，音效充滿立體感。此外，車主既可透過藍芽功能，將智能手機與音響系統連接，又可將音樂檔案儲存喺附設9.3GB硬碟嘅Music Box內，最多可儲存約2,000首MP3歌曲，自建龐大嘅流動音樂庫。另一方面，Q70S 3.7追加咗Around View Monitor，車上四個鏡頭拍攝到車身周邊嘅全方位影像，並於中控台嘅8吋輕觸式屏幕中顯示出嚟，令駕駛者清楚掌握路壆及阻礙物等位置，泊車自然輕鬆得多。

動力表現柔中有勁

Q70S 3.7嘅引擎規格係3.7L V6，動力輸出澎湃且線性，加速特性唔似Turbo車，扭力唔會一早就爆晒出來，反而係引擎愈高轉愈見兇猛，上斜期間爬頭，拖低兩個檔位再畀多少少油，爆炸力即時湧現，降檔時仲會自動作出補油動作，大大減低因轉數落差而造成嘅突兀感。至於乘坐質素同樣高水準，坐墊有番咁上下厚度，柔軟得嚟亦夠Firm，配合預載嘅車廂空氣淨化系統、雙區恒溫冷氣及電動天窗，令全車乘客都可享受愜意旅程。