果然夠把炮　Tesla Model S 85kWh

擺明車馬只做電動車，唔只Sell環保，仲要比對手性能更強、形象更高班嘅Tesla，喺美國本土大賣之餘，就連中國與本地市場嘅業績都一樣標青，老實講，真係搶咗唔少歐洲傳統豪門品牌嘅生意，Tesla真係咁把炮？筆者早前就借咗部Model S 85kWh，試足五日四夜搵答案。

Model S唔只Sell環保，而且台型十足，21吋輪圈就夠煞食。

後排空間寬敞過人，多得2,959mm長軸距及平地台所致。

17吋屏幕既可以變成全屏幕，亦可如圖中上下雙畫面顯示。

可以阻擋多達九成UV嘅玻璃車頂，採用前天窗、後天幕嘅布局。

車速、儲電量與導航等行車資訊，清楚顯示於高對比度彩色屏幕錶板上。

攻彎穩妥可靠，Smart Air Suspension氣壓懸掛應記一功。

前排中間設有小型置物空間，足夠放置手袋及公事包等小型行李。

車頭及車尾都有可觀嘅置物空間，皆因電動馬達與鋰離子電池分置於底盤前後所至。

使用Supercharger快速充電裝置，只需20分鐘，就可將儲電量回復一半。

今趟試測嘅Model S85kWh屬於後驅車款，馬力高達369hp，44.9kgm扭力更加係一踩就有，故此廠方公布嘅0-100km/h只需5.6秒，表現追貼超跑，親身試過喺燈位起步，加速反應真係快，望望側鏡，原本一齊起步嘅隔籬車，已經被拋離近100m，我認，喺呢個Moment，我真係有啲飄飄然嘅虛榮感。應付斜路更加盡展所長，根本同行平地冇乜分別，每次稍稍加大油門，就有一股無形嘅推背力即時出現，而且不動聲色就湧到，電動車天生愛寧靜嘅優點表露無遺，而且筆者嘅試駕車裝咗全面強化嘅Smart Air Suspension氣壓懸掛系統，加埋21吋輪圈，走入彎多路斜嘅清水灣道，就算高速入彎，車身都唔會大幅度側埋一邊，加埋接近完美嘅48:52前後車重比例，唔怪之得攻彎咁爽咁定。

充電Easy過加油

揸電動車，最令人着緊嘅係續航力，廠方表示Model S85嘅續航距離長達425km，揸四、五日先要叉一次電，至於充電配套方面，依家Tesla嘅充電站愈開愈多，已經遍布港九新界，最近仲喺奧海城落戶安裝Supercharger。今次深入測試，筆者大部分時間都做咗柴可夫，接送同事放工、外出拍外景、約朋友食飯等等都係包辦接送，又載埋屋企人遊車河，總共行咗約800km，都只係叉咗兩次電咁大把，第一次喺大埔科學園充電，用咗20分鐘就將電池充至半滿，亦試過剩番70km左右到郵輪碼頭用Supercharger充電，只係用咗1小時15分鐘就叉滿。若果正常情況使用，Weekdays作為返工放工嘅代步車，偶爾一、兩晚放工約朋友食飯，而Weekend就載屋企人去街嘅話，平均一星期充電1.5次已經夠用，真心講，方便程度不弱於去油站！

未上車先急凍

性能表現有超額驚喜之餘，隨車仲有Gimmick設備，車內附有一張無限任用嘅內置3G上網卡，車主可透過中控台嘅17吋輕觸式屏幕，隨時啟動導航系統、搜尋Tesla充電站位置及建議路線，以及按喜好點選世界各地嘅網絡音樂電台等，除此之外，打電話、開關天窗、選擇軚感模式（Comfort/Normal/Sport）、調節懸掛高低等，都可透過屏幕操控，篤吓手指就成事；呢張3G卡仲可以對應智能手機嘅專用App，顯示車輛即時位置、門鎖有冇鎖到、儲電及充電狀況等資料，又可以遙距開關門鎖、響號、閃動頭燈及開關天窗等，筆者最Like係遙距開啟冷氣系統及預設適當溫度，未上車先為車廂Keep Cool，係咪鬥贏好多同級車先？