靚仔筍盤　MINI One Countryman

講MINI，要高性能有Cooper S，仲想升呢有JCW，假如我實事求是，只求一部最易上車嘅MINI的話，就一定係MINI One！除咗最大路嘅三門揭背版外，Countryman都有MINI One版本，並且啱啱抵港開售，車價只係$259,800，耗油量可低至6.9L/100km，夠慳家未？而且慳家唔一定薯Look，今代MINI One Countryman有成10種車身顏色畀你揀，總有一款你會Like啩！

車廂空間布局都同MINI Cooper Countryman相近，MINI車迷置身其中分外有親切感。

圓形布局已經係MINI車廂嘅基調，中控台嘅車速錶及風口位可見一斑。

中央門鎖及霧燈等按鍵，全數置於車速錶底部，就手易用。

外形方面與MINI Cooper Countryman分別不大，同樣係MINI旗下最有噸位嘅型號。

1.6L直四引擎符合歐盟六期嘅廢排標準，耗油量可低至6.9L/100km。

大車身帶嚟大車廂，無論前、後排都有可觀嘅乘坐空間。

頭燈加霧燈，加埋16吋輪圈，仲係歐洲品牌，$259,800呢個車價都好難再挑剔。

車尾嘅標準置物量為350L，收起後排就可擴充至1,170L。

MINI Countryman自2010年推出至今，全球已經售出35萬輛，無他嘅，實用性的確係同門之最，既有五門揭背式車體，車尾嘅標準置物量已經有350L，加埋後排座椅採用40：20：40分割比例，成排收起就可將容量增加到1,170L，夠位放到三至四個大型行李篋。另一方面，由於車身長度及高度分別去到4,097mm及1,561mm，車廂空間又細得去邊？尤其是Head-room空間正係同廠嘅No.1，加埋後排採用平地台設計，高個子、長腿族都可安然就坐。

多元化10色選擇

車廂布局方面，繼續品牌一向嘅「圓」美哲學，錶板、按鈕、風口統統都係圓形，中控台就有大面版車速錶，底下係全新設計嘅霧燈、冷氣及音響鍵；由於波箱係六前速自動波規格，未設加減波功能，自然唔會有軚環轉檔撥片，軚環表面亦冇功能鍵，簡潔到底。至於上文提過嘅10種車身顏色，當中嘅Jungle Green、Cosmic Blue及Midnight Grey屬於新增顏色，小心花多眼亂。

慳油勝過一切

論性能，MINI One Countryman當然唔可以同Cooper S版本相比，不過喺香港已經好夠用，1.6L直四引擎可輸出98hp馬力及15.6kgm扭力，起步反應與加速依然喺合理水平，唔貪快，只求代步，更加唔會Off-road嘅話，已經足夠應付，況且細容積更有天生優點，就係耗油量唔會高得去邊，MINI One Countryman就符合歐盟六期嘅廢排標準，二氧化碳排放量只有159g，比前期款式減少咗5%，平均耗油量就由7.2L減到6.9L/100km，按照目前油價計算，油費只係$1/km左右，屬合理水平。至於安全表現亦都交足貨，喺歐洲NCAP撞擊測試中獲得最高級別嘅五星評級，加上動態穩定控制系統（DSC）及泊車距離報警系統（PDC）等輔助，新牌仔都可以放心駕駛。