Dadny i60 iPhone四圍投

用手機、Tablet睇片，當然愈大芒愈爽；不過，就算你唔嫌重，最多只係搵到20吋芒嘅裝置！嫌未夠喉？咁就要試吓Dadny i60，呢款專為iPhone 6而設嘅殼型迷你投影機，可以將手機畫面直接投影出嚟，最大有成60吋，隨時將屋企變身做戲院，好盞鬼！

Dadny i60 $2,980

i60設有坑槽，可以穩妥平放iPhone 6。

左側設有滾輪用作調校焦點，另內置喇叭，上下箭嘴按鍵則用嚟調校聲量。

透過microUSB可為i60充電，而HDMI及USB分別用作連接其他顯示裝置及為不同裝置充電。

燈泡壽命達20,000小時，另採用德州儀器DLP技術提高對比度。

機面設有電池顯示燈，長按電量圖示即可轉換為外置電池模式。

附送Apple原廠轉接器，將iPhone 6嘅Lightning插口以及i60嘅HDMI連接即可。

用家可以調校屏幕比例，亦設有Eco Mode慳電模式。

投影60吋畫面，線條依然清晰，而且色彩豐富。

即插即用

Dadny係台灣品牌，主力研發LED燈、智能照明等裝置，而近年玩埋手機專用微型投影機。i60設計輕巧，僅重155g，機面備有一個細小坑槽供擺放iPhone 6，方便大家將整個組合拎出街。至於用法就超簡單，只要透過附送嘅Apple原廠轉接器，將iPhone 6個Lightning插口以及i60嘅HDMI插頭連埋就得，毋須下載程式或者喺手機進行任何設定，開着i60就隨即可以將手機畫面直接投射出嚟，遊戲、YouTube、上網等畫面悉隨尊便，無任何限制。

60吋睇片

廠方表示，i60最大投影尺寸為60吋。實測發現，將i60擺放於大概1.8米距離下，就可以投影出60吋畫面；機身左側則設有一個滾輪，上下轉動即可調校焦點，相當易用。不過由於i60嘅亮度只有70流明，想顯示畫面清晰，就一定要熄晒燈、拉埋窗簾，喺幾乎全黑嘅環境之下使用，戶外應該用唔着。另一要扣分就係投影畫面解像度只有640×480，睇片效果合格，但顯示細小文字就有啲朦。話就話專為iPhone 6度身訂造，實情i60亦備有另一組HDMI插口，可以透過HDMI線材連接Android裝置，甚至電腦、遊戲機都得，兼容力強。電量方面，i60內置3,000mAh電池，投影模式下可以使用120分鐘，而且亦可充當外置電池，為其他裝置充電。