LG G4 Beat 色水靚爆

依家係「手機先食」嘅年代，手機嘅影相質素自然愈來愈重要；但現實係除最貴嘅旗艦型號影相有保證外，中低階機嘅相機功能確實參差。最近LG推出嘅中階機G4 Beat就唔同咁講，佢主打影相功能，雖然賣二千零蚊，但主鏡頭支援雷射自動對焦，更移植咗G4嘅色譜感應器，確保影像可以忠於實物原色。

$2,498

機背、屏幕都呈弧形，幅度唔算大，手感唔錯。備有黑、白、金三色，機背殼印有菱形Monogram暗紋；而小記手上嘅係黑色，但係實物所見比較接近灰色。

內置2,300mAh電池，容量唔算大，未必夠用一整日。

採用Android 5.1作業系統，撥頁、開Apps爽快。

內置Glance View功能，熄芒待機時於屏幕由上而下掃動即會顯示時間、日期等資訊，不過介面設計就冇舊版咁靚。

當然唔少得QuickMemo+功能，可以隨時記事、畫畫。

播《神奇四俠》預告片，屏幕對比度夠高，細位顯示亦見清晰。

設有手動拍攝模式，白平衡、對焦距離、ISO、快門等全部可以調校。

雖然定位屬中階，但G4 Beat設計上一啲都唔求其，同G4一樣玩弧背、弧芒，手感好之餘，亦令機面夠貼面，煲粥時更舒適；不過就冇G4嘅招牌皮背，只係塑膠背殼，幸好表面加上菱形Monogram暗花，低調中見心思。此機力銷影相，佢備有800萬像素後置鏡頭，支援雷射自動對焦功能（Laser Auto Focus），以激光探測物件同鏡頭嘅距離，就算喺低光環境下都可以爽快對焦。最犀利就係加入Colour Spectrum Sensor（CSS）色譜感應器，提升色彩精準度，令拍攝出嚟嘅相片可以貼近實物原色。值得一提，G4 Beat內置手動拍攝模式，用家可以隨時調校快門、ISO、白平衡等設定，似足相機咁Pro！

顏色顯示準確

影到靚相，當然都要有靚芒先睇得真。呢方面，G4 Beat就備有5.2吋IPS屏幕，解像度達1,920×1,080，雖然質素不及G4嘅2K屏幕，但亮度、細緻度都相當高，而且顏色顯示準確，整體表現唔錯，中階機嚟講更屬超班！至於規格，佢改用Qualcomm Snapdragon 615 1.5GHz八核處理器，搭載1.5GB RAM，唯一要扣分就係僅內置8GB ROM，對於需要下載大量Apps嘅用家就未必夠用。另外，此機支援4G網絡，確保上網速度。