美麗的誤會　Mazda3 SKYACTIV-G 2.0 Hatchback

最近筆者換咗車—Mazda3 SKYACTIV-G 2.0 Hatchback……六日咁多，每次做新車長測，少不免要做埋「柴可夫」，今次都唔例外，期間接載過不下10位同事與朋友，十個有九個見到中控台嘅i-ELOOP制動力回收系統顯示，都會異口同聲問句︰「萬事得有出Hybrid咩？」睇嚟i-ELOOP嘅顯示介面幾成功吖，引起大家有美麗的誤會。雖然並非Hybrid型號，但係今代Mazda3用咗SKYACTIV動力技術，加埋i-ELOOP制動力回收及i-stop停車熄匙兩項輔助功能，兼顧性能與環保效益。

原廠皮椅承托力出眾，駕駛席仲有電動調校功能。

Mazda3既有SKYACTIV-G引擎，又有i-stop引擎怠速自動熄火功能及i-ELOOP制動力回收系統，做到低耗油、低廢排。

多功能皮革軚環附設加減轉檔撥片、藍芽免提及音響操控鍵，手不離軚都可操作得到。

波棍台底部設有專為Mazda Connect而設嘅Commander Control旋鈕，就手易用。

i-ELOOP制動力回收系統嘅運作情況，透過中控台嘅七吋屏幕清晰顯現。

隨車已有高置LED煞車燈，主動增加行車安全。

打開電動天窗，車廂自然更開揚。

車尾置物量特別大，行李多多都冇有怕。

屬於同系頂級版本嘅Mazda3 SKYACTIV-G 2.0 Hatchback，165ps馬力與21.4kgm扭力完全來自2.0L直四SKYACTIV-G引擎，數值上相當可觀，實際表現又點？筆者試過喺昂船洲大橋經繁忙三號幹線往尖沙咀方向行駛，每當面對突如其來嘅加速需要，引擎與六前速SKYACTIV-Drive自動波箱都表現合拍，帶嚟敏銳、直接嘅加速反應，力量可謂隨傳隨到。今次嘅六日長測又多次穿梭大埔道，每當落斜時，刻意撥動軚環附設嘅轉檔撥片到三波位置，全程落斜，尤其是入彎前都毋須「印」住個Brake。加埋懸掛及轉向系統都偏向較硬嘅跑化設定，所以即使稍為高速入彎位，操控上都令筆者Feel到可靠紮實。

i-ELOOP幫到手慳油

至於內籠布局，標準配備已經有投射式行車資訊顯示屏（Active Driving Display）及七吋HMI輕觸顯示屏，前者置於軚環前方，以投射方式顯示車速，後者就位於中控台頂部正中央位置，對應Mazda Connect多媒體系統，顯示音響、通訊與導航等多種資訊，仲清楚Show埋i-ELOOP制動力回收系統嘅運作情況；減速時會將多餘嘅動能回收，再轉化成電能，儲存喺雙電層電容器內，供電畀車上其他電子設備，藉此間接減少耗油量，經過連日駕駛，合共行咗640km，全程冷氣長開，最遠試過由大美督經長沙灣、美孚到深井，還車時儀錶板嘅平均耗油量顯示係12.8km/L，以目前油價計算，油費僅$1.2/km，以2.0L車款嚟講，相當唔錯呢！

音色表現喜出望外

揭背車畀人嘅印象，向來都係乘坐空間一般，今代Mazda3卻係例外，軸距長達2,700mm，令前、後排都有唔錯嘅空間感，筆者試過喺滿載嘅情況下，尤其是後排坐咗三位身形有番咁上下嘅男同事都唔覺勉強，就連車尾置物量都有交代，後排既可以60:40比例靈活收摺，若然完全收起嘅話，最大置物量超過1,200L。不過最令筆者開心嘅，係六揚聲器中控台音響系統，筆者每次揸車都一定要聽歌，呢套音響真係做到中音甜、低音準，平日聽慣聽熟嘅私家歌集，喺呢六日覺得寧舍有Feel。