身為高達迷，冇可能未聽過「紅彗星」馬沙嘅大名，要數佢嘅專用座駕，渣古MS-06S、魔蟹MSM-07S、格魯古MS-14S、自護號MSN-02、百式MSN-00100及沙薩比MSN-04等等，粉絲一定噏得出，筆者即管考考你，馬沙上校嘅最新座駕係邊部？

紅彗星專用渣古，頭頂一定有隻角，馬沙專用Auris又點可以例外？

新版馬沙Auris嘅細節設計更加講究，輪圈改用雙色設計，啞色表面就與車身看齊。

馬沙上校專用嘅雄鷹標誌，喺車尾清晰可見。

前座改用桶椅之餘，座墊仲壓印咗自護軍標誌，以及虛擬工廠「ZEONICTOYOTA」（自護豐田）嘅大名。

MS-185H-CA02嘅首展禮上，有阿寶嘅聲優古谷徹擔任嘉賓，可惜聲演馬沙嘅池田秀一缺席。

同步仲有量產型渣古版本，唔只車身顏色與拉花細節有別，性能規格都與馬沙專用版有出入。

答案係MS-185H-CA02呀！佢唔係MS、亦唔係MA，係車！記性好嘅高達迷，應該記得兩年前豐田（Toyota）出過部馬沙專用嘅Auris，最初只係玩票性質做宣傳，點知坊間反應奇佳，相信廠方喺受到無數嘅電郵以至電話查詢下，結果順應民意，將呢部編號MS-186H-CA嘅Auris特別版破例量產，令身兼車迷與高達迷嘅超級粉絲可以馬沙上身，呢款車香港都有入口，可惜只係水貨，數量只有個位數，無計啦，日本方面都唔夠賣呀！

全身造型大改動

身為車迷，又有邊個成世人都唔換車？何況係型英帥靚正，仲要咁多年嚟都人氣高企嘅馬沙上校？就趁Auris喺今年四月推出Facelift小改款版本，豐田就幫馬沙上校換新車，啱啱發表咗「二代目」嘅馬沙專用版本，編號MS-185H-CA02，仲拍埋宣傳短片。講明先，性能方面唔似MS-06S咁樣，比起一般嘅渣古（MS-06F/J）「快三倍」，只係維持原裝規格，編號8NR-FTS嘅1.2L引擎可輸出116ps及18.9kgm扭力，但係講賣相，就比MS-185H-CA更加有型，唔只換咗全新嘅包圍、拉花及車廂裝飾，更顯著嘅改動係紅色車身由光澤變成啞色，頭冚中間變咗黑色，加埋大大個黃色嘅自護軍Logo，有型指數點只勁三倍！

加推綠色量產型

更加出位嘅係，上次嘅特別版Auris只有馬沙版本，今次就連量產型都有，車身改為綠色，似足量產型渣古嘅變奏，就連性能方面都跟足戲，馬沙版本屬於高性能規格，量產型嘅編號係「MS-185H」，改用1.5L嘅1NZ-F引擎，馬力與扭力分別係105ps及13.8kgm，比起MS-185H-CA02係弱咗少少。行文至此，相信大家都好關心幾時開售？雖然廠方未有表示投產與否，只係作為參展作品，現時於六本木舉行嘅「機動戰士高達展THE ART OF GUNDAM」現身造勢。不過上次都係喺群情洶湧嘅情況下，廠方唔嫁又嫁就將「初代目」量產，難保唔會有第二次，香港粉絲更加要求神拜佛，本地車行代理唔好再學上次咁走寶冇入貨。

短片網址︰http://bit.ly/1CI1bLj

文︰Dick