車，有邊位爸打唔鍾意？仲喺日本播緊嘅《幪面超人Drive》玩得更盡，以往嘅拉打大多數都係揸兩個轆，今次嘅第一主角Drive（泊進之介）一開場就改玩四個轆，至於其他拉打，不分正邪，幾乎人人有車揸，好似第二主角Mach（詩島剛），一身白色鐵騎士造型，加上白色「大羊」Macher跟出跟入，搶鏡程度絕對唔會輸畀Drive，變成SHF Figure都一樣型得起！

SHF Kamen Rider Mach 建議零售價︰¥4,000
SHF Kamen Rider Macher 建議零售價︰¥4,800

電單車形狀嘅Signal Bike，唔只可以放入變身腰帶，亦可以放入手槍形嘅「前輪射手」內。

素體維持SHF一貫嘅高可動性，可以擺出多種甫士，最好玩係面罩似足電單車頭盔，唔使換件，可以直接揭開。

煞車碟髹成銀色交差，螺絲位冇補上黃銅色，線位又冇滲線，兩個字講晒︰求其！

側鏡塗裝完全冇鏡面效果，最離譜係錶板黑色一片乜都冇，真係搵唔到理由原諒囉！

與第一主角Drive（左）相比，筆者真心覺得Mach順眼好多囉！

以往嘅拉打，多數揸爬雞或者Fairing，Macher就係少數嘅綿羊車款。

基本形態

敵人止步

子彈急轉彎

天降霰彈

雖然Mach係第二主角，不過佢一出場嘅戰鬥力，已經勁過Drive（Drive之後嘅升級招數及形態就另當別論啦），尤其是造型方面，真心講，順眼過Drive多多聲，起碼唔係孭條車胎上身，改為右邊膊頭掛個車轆仔算數，最出位係面罩部分可以向上揭起，似足新派嘅電單車頭盔設計，鐵騎士造型完全上晒身，SHF版本亦都跟到足。

出招Parts跟到足

SHF Mach嘅另一Gimmick，就係可以放入唔同顏色嘅Signal Bike入變身腰帶Mach Driver Honoh之內，而膊頭嘅車轆亦有相應嘅換件設計，對應由「前輪射手」（Zenrin Shooter）手槍所發射嘅不同必殺技，先以Mach本身為例，就附有基本型嘅白色Signal Bike及膊頭車轆，以及令子彈識轉彎嘅綠色Signal Bike，而專用車轆就貼上示意轉彎嘅箭嘴貼紙；至於同步推出嘅專用大羊Macher，亦附有兩組相關配件，分別係喺劇中發揮霰彈功能嘅藍色Signal Bike，以及令敵人停止活動嘅黃色Signal Bike，當然唔少得相應嘅車轆組件。即係話，粉絲想玩齊Mach唔同嘅攻擊招數嘅話，難免要入埋同系嘅Macher了。

大羊細節差強人意

其實有拉打就有電單車，相信唔少粉絲都覺得天公地道，Mach、Macher同時入貨早就心中有數，尤其是Macher以正常大貨推出，價錢公道啲，唔似Driver嗰部Tridoron跑車歸入Premium Bandai網購商品類別，變相賣貴咗。雖則Macher嘅整體造型都算交足貨，起碼比例正確，塗裝又冇乜出界，但係以建議零售價4,800日圓而言，Detail位嘅水準真係交唔到貨，雖然滲線欠奉已係預期之內，但係前後煞車碟及後輪鏈條只係單一銀色算數，冇喺螺絲位加番黃銅色；最大敗筆係兩邊側鏡髹做銀色交差，其實貼張反光嘅銀面貼紙唔係好大工程啫，像真度又會高好多，仲有儀錶板仍然冇改善，同以往嘅SHF拉打電單車一樣，唔上色，連貼紙都慳，一片黑色平面了事，成為整部車最失真嘅地方，就當六算計，叫價HK$290左右嘅拉打電單車，有番張貼紙扮錶板唔算過分啩！

查詢︰2433 1828（瑞華行）

文︰Dick

攝︰Kent、Fanny