米高佐敦被封為籃球之神，實在太好波，太離地，於是大家轉移模仿柏賓，希望學到佢嘅全能打法，年月過去，人長高了鬚根也多了，終於明白原來要做全能戰士，比瘋狂得分仲困難，呢個「最接近神嘅男人」，有時可能比波神更厲害，於是開始瘋狂儲佢嘅球鞋T恤簽名波，今屆ACG，Enterbay仲出埋柏賓嘅1/6 Figure，可以與同廠嘅佐敦Figure重現Flu Game一幕，自問係公牛王朝追隨者嘅你，點可以錯過！

話說97年總決賽第五戰，佐敦食物中毒照入38分贏波，賽後倒在柏賓的臂彎中，史稱「Flu Game」。依家EB兩個Figure都出齊，粉絲可以Replay呢個歷史時刻了。

左邊手臂印有「PIP」紋身，項項細節跟到足。

頭雕五官輪廓其實幾到位，實物絕對比睇相好，美中不足係雙頭雕嘅表情太相似。

EB 1/6 NBA Masterpiece Scottie
Pippen
推出日期︰即日起

Air Pippen II（上）及Air More Uptempo（下），細節位做足，只欠Swoosh標誌與AIR字樣，皆因授權問題，非戰之罪。

紅色包裝盒印埋33號字樣及柏賓簽名，梗係要連盒儲啦！

動漫節零售價︰$1,780
由左至右，洛文、佐敦都係6呎6吋高，柏賓就高6呎8吋，所以柏賓Figure跟番比例略高於兩位拍檔；動漫節期間仲會推出「公牛王朝Big 3」組合，只需$4,880就可以有齊公牛鐵三角。

身為全職LEGO創作藝術家的Andy Hung，是全球僅13位LCP的其中之一，也是13位LCP之中唯一的華人代表。

身為香港Figure品牌，Enterbay唔只有李小龍打出名堂，又有葉問、寧采臣等本土特色作品，至於面向全球，與世界接軌嘅，除咗有Terminator與Batman等大路之選，近年來最具話題性嘅舉動，莫過於敢為天下先嘅NBA 1/6 Action Figure。其實早於兩年前開創NBA Masterpiece用佐敦打頭陣之餘，大把球迷都想EB出埋柏賓，呢位傳奇球星唔只球技超卓，係公牛嘅六冠功臣，而且霸氣十足，只有佢夠膽講︰「冇我，佐敦一次冠軍都攞唔到！」繼兩年前嘅佐敦、去年嘅洛文後，今年ACG有埋柏賓，公牛鐵三角終於齊人了！

素體升級放心扭

實物到手，開箱後拎起頭雕細望，由SCUDERIA落刀、YJ塗裝監修嘅雙頭雕，基本上矇眼、大鼻、厚唇以至瘦長臉頰等特徵都跟到足，頭髮、鬚根亦見逼真，稍要挑剔則係兩個表情太相似，若非其中一個微微張嘴根本難以分辨，若然出多一個鋤樽O嘴樣，擺甫士一定更傳神呢！還好素體做工加番分，根據真人比例打造，高約13吋，拍埋佐敦、洛文隔籬，似足真人高多少少，最抵讚係明顯改善咗關節位嘅鬆緊度，扭動時唔似以前咁用力，連令人提心吊膽嘅啪啪聲都少咗好多，放心扭。

經典波鞋盡力還原

早前美國專門出復刻波衫嘅Mitchell& Ness，揀咗「天勾」渣巴為NBA歷史上最勁嘅33號，唔緊要，相信好多80後如筆者，始終覺得柏賓先係「33」號嘅第一人，所以今次Boxset有齊公牛主場及作客兩款33號波衫，連埋波褲、波襪、護肘等配件，齊料程度令人感恩，尤其是柏賓有唔少Singature Shoe，EB就揀咗最經典嘅紅白Air Pippen II及黑白Air More Uptempo，鞋形、鞋帶、外底紋理以至Air位都做到足，美中不足係少咗「一剔」授權，所以抽走咗鞋面嘅Swoosh標誌及AIR字款；其他配件就有總冠軍獎盃、Spalding磁石波及公牛圓形地台，就當筆者貪心，如果有埋柏賓喺94年贏嘅全明星賽MVP獎座，就真係完美得無話可說！

LEGO擺陣 全球做節

作為ACG的台柱，今年又豈會少得LEGO的份兒？除有特設新Boxset開售，今屆更以「世界節日巡禮」為展覽主題，由14萬顆LEGO組件組裝成12款世界節日模型，包括丹麥的安徒生節、印度的大象節，以及中國的農曆新年等；同場還會舉行樂高建築師大賽，今屆的題目是「理想家居」，而且首度增設了專為12歲以下小粉絲而設的兒童組，全球首位獲得LEGO Certified Professional（LCP）資格的華人LEGO大師Andy Hung，獲邀成為兒童組的專業評判，到底哪位小朋友的傑作可以雀屏中選？結果在本月28日就會即場分曉。

展位：F12　查詢︰2332 3615（Enterbay）

文︰Gilbert　攝︰Homan