老老實實，自從阿仙奴上季開始同PUMA結盟，真係多咗唔少Gimmick，去年出動水幕投射，喺泰吾士河畔大搞波衫發布會，又喺球會風褸上加設特製拉鏈扣，令「教授」雲格唔再有拉鏈失靈嘅尷尬場面，最重要係好腳頭，幫到球會蟬聯足總盃，英超排名又總算再進一步，唔再年年「梗頸四」，今年夏天唔使再打外圍賽，可以第三名嘅成績直入歐聯；個頭開得靚，今年又會點樣乘勝追擊先？

10位阿仙奴球星擔任首發會Model，當中包括辛迪卡索拉（Santi Cazorla，左一）、韋舒亞（Jack Wilshere，左三）、法明尼（Matheiu Flamini，左四），以及香港球迷錫到燶嘅奧斯爾BB（左二）。

啱啱由車路士轉會阿仙奴嘅施治（右二）唔只隨隊外訪新加坡，仲着埋作客龍門波衫出席首發會，可惜呢款新衫暫時未有行貨輸港。

阿仙奴
2015-16作客球衣
$599

衣料用上Dry Cell技術，配合Form Strip網面，發揮透氣、乾爽嘅作用。

金色表面加上鑽石形圖案，比起以往同色作客波衫嘅淨色設計，更見心思。

隊徽用咗熨貼設計，薄身之餘亦見層次感。

領位背後嘅三角形圖案，內有分別代表球會嘅「A」，以及象徵勝利嘅「V」兩個字母。

今季嘅作客波衫於新加坡舉行全球首發會，仲安排球迷入場觀禮，實行與眾同樂，衷心希望下季可以移師香港舉行啦！

唔只主、客波衫，新球季嘅練習波衫都有型有格，雲格着住佢出席記招，成個後生晒，呢款新衫已經抵港上架，售價$399。

自問同阿仙奴球員一樣身形咁Fit，爆肌唔怕Show嘅話，雞翼袖嘅練習波衫至襯你，售價$359。

阿仙奴2015-16主場球衣（ACTV）$1,299

阿仙奴2015-16主場球衣（球迷版）
$599

開領設計頗有復古色彩，同上一季相比，新主場波衫仲加入金色綑邊添上貴氣。

ACTV版本嘅衫身內部布滿ACTV膠貼，發揮輕微嘅肌肉按摩作用。

evoPOWER 1.2 FG
$1,299

鞋底內藏獨有嘅GSF，係增加射門力度嘅關鍵所在。

鞋面用上GripTex設計，可以加強控球效果。

去年嘅水幕發布會，一次過Show晒主客三件新波衫，PUMA今年繼續大陣仗有新意，而且改為分階段爆料，早前喺兵工廠嘅大本營酋長球場舉行咗2015/16嘅主場波衫首發會，之後就趁球隊外訪去到新加坡參加巴克萊亞洲錦標賽（Barclays Asia Trophy），輪到作客波衫舉行全球首展禮，並且喺阿仙奴VS新加坡明星隊嘅賽事上首度上陣，結果輕輕鬆鬆大勝4:0，睇嚟新波衫真係幾旺兵工廠喎！

鱗甲上身戰意高

作客波衫嘅發布會喺賽事前一晚於新加坡河畔嘅Esplanade舉行，大會別出心裁以雷射投射方式，先喺舞台中央「豎立」咗一件有成5m高嘅珍寶級主場波衫，當發布會正式開始，波衫嘅表面突然變黑晒，繼而雷電交加，之後一個個金色嘅菱形格仔漸次出現，好似縫製盔甲咁樣組合起嚟，最後變成新季度嘅作客波衫模樣（on.tv有片睇），而波衫兩旁就有10位阿仙奴嘅球星上台現身，包括啱啱轉會加盟嘅施治（Petr Cech）、被Paddy Power選為英超最有魅力球星基奧特（Olivier Giroud），以及深受香港粉絲歡迎嘅「大眼仔」奧斯爾（Mesut Ozil），雖則球季未開鑼，不過個個嘅身形都Keep得好Fit，即使呢件作客波衫唔係超貼身剪裁，依然凸晒胸肌兼且走晒腩肉，唔通略為鬆身嘅剪裁可以「隱惡揚善」？

首戰報捷好意頭

阿仙奴嘅作客波衫一向以黃色為主，去年都唔例外，今年PUMA就升級為金色，令人眼前一亮之餘，衫身正背面都布滿鑽石形嘅圖案，整體賣相變得高貴、精緻，而且睇過開場時嘅雷射投射表演，筆者覺得新波衫更似古代騎士所着嘅鱗甲（Scale Armour），更顯戰意。除此之外，領位背後嘅三角形圖案，巧妙地將「A」與「V」兩個字母結合起嚟，前者大可視為球會名字（Arsenal F.C.）嘅縮寫，而V當然代表勝利（Victory），寓意新球季嘅兵工廠長戰長勝。至於功能設計方面，衣料用上Dry Cell速乾技術製成，可以快速揮發汗水，加上膊位連衫袖，以及兩腋位置用咗Form Strip網面結構，加強透氣效果。講開又講，其實阿仙奴喺2001/02，以及2002/03兩個球季嘅作客波衫都用過金色設計，呢兩季都贏到足總盃之餘，2001/02嗰季仲攞埋英超冠軍成為雙冠王，既然金色對兵工廠咁有利，粉絲們對今季嘅成績相信會更有信心吧！

主場至夾肌肉男

作客波衫固然充滿話題，主場款式亦都夠晒心思。身為英國老牌球會嘅阿仙奴，早於1886年成立，紅色衫身、白色衫袖呢個波衫配搭，早已深入民心，原來呢個Pattern於1933年先至首度採用，自此除咗2005/06嗰季，就一直沿用至今，今季當然唔例外，加上復古嘅開領剪裁，更添懷舊味道，見出設計師對球會歷史嘅高度重視，而且領位與袖口都加上金色綑邊，為新波衫注入貴氣。與上季一樣，新主場波衫備有球迷版及ACTV兩款，前者採用鬆身設計，較易Carry；後者相當接近落場版，唔只用咗貼身剪裁，衫身內部加有ACTV膠貼，發揮按摩作用，有助減少肌肉疲勞以至受傷嘅機會，自問講究功能表現，身形又夠Fit嘅兵工廠粉絲，識揀啦！

重炮手威力強化器

除咗阿仙奴主客波衫，PUMA喺綠茵場上另有新動作，就係為evoPOWER 1.2推出新配色，由之前嘅深紫色變為白×橙×藍，感覺煥然一新，至於功能設計維持原狀，既有標誌式嘅GSF鞋底設計，令鞋底可以緊隨腳掌屈曲，從而加強射門力度，至於鞋面亦有GripTex圖紋設計，藉此增加AccuFoam控球區嚟到提升球感。今期有意換Boot，閣下又係腳腳七注嘅重炮型射手嘅話，不妨多加考慮。

查詢︰2834 3821（銅鑼灣崇光百貨四樓PUMA Store）、2242 7478（樂富廣場二期一樓PUMA Store）

特派記者︰Dick（部分圖片由PUMA提供）　鳴謝：PUMA HK