Archos 80b Helium 4G 法式靚手感

一般入門級平板電腦，為節省成本，機殼多數係塑膠做，手感自然差一截。向來重視設計嘅法國品牌Archos，就特別喺機身物料上着手，最新Tablet產品80b Helium嘅機背就用咗金屬，而且仲加入髮絲紋，外觀、手感都相當唔錯！

機身重320g，唔算輕巧。$1,599

拆開機背頂部蓋掩，即可以更換SIM卡及記憶卡。

設有聽筒，可以當手機咁用。

機背大部分位置都用上金屬物料，手感不俗，亦不易黏上手指紋等污漬。

內置電話功能，介面與一般手機相同。

支援雙卡雙待功能，可以於「SIM卡管理」設定數據連接、主卡等設定。

雖然只有1GB RAM，不過系統唔算大食，閒置時亦有350MB可用RAM。

《Archos Video》屬播放器程式，支援多種影片格式，相當實用。

其實Helium 4G共有三個型號，分別係70、80B以及101。而今次新返嘅就係備有8吋屏幕嘅80B。雖然屏幕解像度只有1,280×800，相比全高清機款自然輸蝕，幸好採用IPS素材，色彩、對比度都唔差，用嚟煲劇應該夠用有餘。此機更加係平板產品中，比較少見支援4G制式及雙卡雙待功能，兼容800、1,800及2,600MHz三段頻譜，啱晒香港網絡，睇HD串流都冇問題。

雙卡雙待打出打入

另外，機身仲加設聽筒及咪高峰，唔嫌機身太大部的話，當手機咁講電話亦無妨。硬件方面，就屬入門級，備有1.5GHz四核心處理器、8GB ROM，可惜只內置1GB RAM，想玩多工作業就未必應付到。作業系統則採用Android 4.4 KitKat，介面近乎原生版本，廠商自家元素有限；較特別係內置《Archos Video》App，支援常用影片格式、解碼，亦提供字幕等功能，而且仲可以透過DLNA將畫面投射至大電視，一眾劇迷實鍾意。