某個深夜，當老友傳來一張疑似劇照的東西，那疑似《捉鬼敢死隊》（Ghostbusters）的相片，一架白色捉鬼車前，站着四個……吓？女人？而且身穿捉鬼裝備，高矮肥瘦，仲有染金毛MK Look，真係笑都笑唔出！係核突！爛撻撻咁款，第一感覺係網友惡搞！

再問朋友，他說並非惡搞，而是真真正正的劇照！係新一套《捉鬼敢死隊》電影，原來係全女班版本，好像還未拍完，近日仍在紐約趕緊戲。相片更加是電影公司主動公開的四位女主角懶有型合照！不過，我一點也不覺得有型！美國網民們也對此鬧到爆！

有些事在世間是不公平的，四個男人麻麻甩甩、爛撻撻、污污糟糟，觀眾接受到，而且有時算型！但同一套設計造型，套落四位女士身上的話，就是災難性的錯誤！電影是賣美感、賣藝術等，在相片上看，無美感、無藝術可言！甚至噱頭也算不上，是玩弄女性罷了！當然有女性可能會呼喊：「男人做到的，女士一樣做到！」好！做飽佢！其實一直不明白，當年超紅的《捉鬼敢死隊》，在全球賣座之情況下，為何拍拍吓就停了下來。但一別二十多年後又拍，實在令人意外。對於作為影迷的我，知道再拍當然高興，但一見造型，會否整爛敢死隊固有形象？

所以，劇情可能就成為關鍵，靈體造型又係另一個關鍵！當年大棉花糖鬼真係好大破格，新版又能否有突破呢？畀我狂想，希望見乜鬼？例如拉登鬼！希特拉鬼！毛澤東鬼……等等，毛主席不信有鬼，本身不能成鬼噢！但咁先好睇嘛！