冇得輸Kia Optima

最近有朋友話想出部新車，目標係四門五座位房車，約$300,000樓下，問有冇介紹，聽落好大路，大把日本車入圍，但係講講吓就愈嚟愈多要求：「最好拍得住歐洲車啦，個Look要Sporty，尾箱又要大喎，有埋後波鏡頭加前後泊車感應器就更好！」本來費事答佢，但現實又真係有，就係起亞（Kia），筆者之前試咗部Optima，由內外裝潢以至駕乘感受都同歐洲對手有得比，但係車價只係$239,000，假如能夠撇除品牌效應，實實在在從性價比考慮，其實Optima幾難輸。

Kia Optima

DRIVE MODE鍵設於軚環左方，備有Eco、Normal及Sport三種駕駛模式選擇。

雙圈式儀錶板嘅中央設有輔助屏幕，提供波檔、即時耗油及駕駛模式等資訊。

先按下電子手掣下方嘅Auto Hold鍵，再踩Brake一下，就會啟動防止車身溜前或溜後功能，好處係唔使長時間踩Brake，塞車時大派用場。

前排座椅設有電控及冷暖功能，駕駛席仲有八個角度調校及記憶功能。

後排座椅空間寬敞，全拜2,795mm嘅軸距所賜。

輕觸式屏幕對應倒車鏡頭，車尾情況一目了然。

三幅式D字形多功能皮革軚環，賣相得體，而且握感實在。

電鍍框鬼面罩、鈎形排列嘅LED日間行車燈，以及田字形嘅LED霧燈都全屬新設計。

今代Optima由歐洲專家擔任形象設計，成個Look甚有層次及力量感。

新Optima嘅造型充滿時代感，已經博到唔少印象分，事關廠方將外觀設計交畀德國法蘭克福設計中心嘅開發團隊負責，唔怪得成個Look咁有歐陸Feel，似足Super Hero眼罩Look嘅鬼面罩，用上網紋設計，外框又有電鍍處理，英氣與貴氣兼備，

車身兩側又有多度深刻骨線，豐富外觀上嘅層次感，最醒神都係頭燈組合，燈罩頂部嘅LED日間行車燈跟隨車身主線條上揚，夠神氣，而車頭底部左右兩側各有一組由四顆LED組成嘅霧燈組合，「目光」更見銳利。

上車唔怕辣Pat Pat

車廂布局方面，車長多達4,845mm，加埋軸距都有2,795mm，唔只造就寬敞嘅乘坐空間，就連尾箱都大過唔少同級對手，容量達到501L，擺放高爾夫球桿袋都唔成問題。至於前排座椅有齊電動調校及冷暖風功能，炎炎夏日，上車後立即啟動冷風功能，好快就可以為腰背降溫。仲要留意中控台頂層設有4.3吋彩色輕觸式屏幕，對應音響之餘，倒車時又可與泊車鏡頭連線，將車尾嘅實時影像Show晒出嚟，仲有前後泊車感應器幫手，P牌一族都可定過抬油，唯一挑剔係屏幕略嫌細咗啲。其他標準裝備包括三幅式D字形皮革多功能軚環、車廂內置藍芽免提裝置、附設八個喇叭嘅Infinity高級音響、前後雙天窗及雙區恒溫冷氣等，係唔係足料過唔少歐洲車先！

Sport Mode最好玩

至於動力核心就由2.0L直四自然吸氣引擎擔綱，馬力162ps，配合可作加減波操控嘅六前速自動波，夠力之餘亦兼顧駕駛樂趣，加上預設咗Eco、Normal及Sport駕駛模式，透過軚環左面嘅DRIVE MODE鍵就可輕易切換，靈活對應唔同路況以至駕駛心情需要，例如採用Sport模式駕駛，引擎反應會即時變得敏銳，面對突如其來嘅加速要求都唔會托手（月爭），而且力量輸出亦見線性，加埋低重心嘅車體及跑化懸掛，攻彎能力都有幾分跑車Feel。

咁好玩，筆者今次都貪心試耐咗，三日兩夜後先至還車，合共行咗416km，港九新界都行勻，最遠試過由沙田入機場，然後再由機場出大角咀，最後返回沙田，交車時錶板上嘅平均耗油顯示為7.7L/100km，以目前油價計算，油費唔到$1.2/km，慳油表現都算合理，鬼叫筆者全程開行冷氣，踩油又唔留力咩。