近年香港嘅Figure界看似百花齊放，但係深入啲睇，其實題材愈做愈窄，唔係美漫英雄，就係Sci-Fi角色或者NBA球星，反而以前作為中流砥柱嘅原創兵人，今日變成極罕級數。本地Figure新貴Devil Toys沒有跟風、未忘初衷，主腦George Chu用咗足足一年時間、花咗數十萬元投資、設計而成嘅Secret Master，由故事、原設到Figure身上每件Parts，都係自家手筆，敢想敢做，邊個話香港嘅年輕人個個要靠芭蕉扇唔捱得！

Devil Toys Secret Master 售價︰$1,350

關節數目逾30個，鬆緊度適中，而且可動性高，大部分甫士都難佢唔到。

「Secret Master」嘅頭雕夠晒殺氣，可惜礙於成本，若然加埋着燈Gimmick就更正。

「Secret Tropper」嘅設計靈感源自渣古，畀多個「雜兵」Look玩家更換。

軍用背心及腰帶可插入各款裝備，而且增磅之後都唔會影響Figure嘅平衡度。

武器方面，既有衝鋒步槍、手榴彈及地雷等重火力選擇，亦有手槍與小刀作傍身之用。

雙手係機械部件，表面嘅舊化塗裝經過30個工序先至完成，絕非移印咁敷衍。

George Chu希望Devil Toys嘅成立，可以為本地Figure玩家帶嚟新鮮感，未來會集中發展「WOO」及「九龍戰道」系列，而首個授權作品《海虎》，最快喺今年12月正式現身。

喺香港，玩玩具被人當廢青，如果玩到辭工瞓身做老細搞開發，唔只冇乜人欣賞你有理想有勇氣，反而畀人無限上綱嘲笑你不切實際。喺英國大學攻讀藝術嘅George，敢以雞蛋對高牆，去年一擲六位數字成立Devil Toys，誓要讓本地玩家有真選擇，他表示︰「玩咗廿幾年玩具，有啲題材，例如原創嘅科幻角色一直好想玩，偏偏咁多年嚟都冇廠商推出，既然係咁，不如自己創作，所以去年四月開咗公司，全身投入開發工作。」George父親開廠，咁你以為佢成功需父幹就大錯特錯，屋企人只係喺包裝及營商方面畀意見，資金、設計、監工全部由George自己一腳踢，經過一年發展，旗下嘅「War of Order（WOO）」軍武系列終於誕生。

過得自己過得人

就如好多大細路，George偏愛末日科幻題材，WOO嘅故事發生於2047年第三次世界戰爭，各國委託僱傭兵集團增強實力，半人半機械嘅Secret Master就係當中最強嘅僱傭兵之一。市場上並冇啱用嘅現成Body，George於是自行開發，從成品所見，素體嘅外露部分，例如頭部、雙手都係機械部件，以人手髹出舊化嘅塗裝效果，而上身及雙腳等位置有軍服遮蓋，就用番傳統嘅人形設計。由於素體混合咗呢兩種元素，因此單計開模費已經高達20多萬元，而且George都係玩具迷，基於玩家角度，就連手肘、膝頭及腰部等主關節都刻意作出強化處理，先至過到自己嗰關，唔只擺到好多甫士，就算掛上大量配件都依然企得穩，他認為︰「好多人買隻Figure返嚟齋睇唔玩，所以我決定飛走個Stand，希望大家真係可以攞上手玩。」

渣古頭最多Like

另一方面，由於Secret Master不設真人頭雕，某程度上減低咗製作難度，不過唔代表係Easy Job，事關George參考咗大量外國插畫設計出兩款頭雕，當中又以名為「Secret Tropper」嗰副頭雕最受網友歡迎，George直言︰「可能大家鍾意雜兵，所以我就設計咗呢款單眼頭雕，向渣古致敬！」比起頭雕，軍服製作更令人直豎拇指，混合咗數碼迷彩布及彈性綿布，剪裁貼身，又有刺繡軍章、背心、頸巾等軍事化Parts，充滿實戰Feel！而且做到周身刀張張利，武器包括髹咗沙漠塗裝嘅衝鋒槍、手槍、軍刀、雷達儀、震撼彈、手榴彈與磁力指向性地雷等等，數量上完勝某啲大廠，配件控絕對冇投訴！

查詢︰3157 0796

文︰Gilbert

攝︰Pen