早前介紹過尼馬嘅全新拍檔—Nike Hypervenom II,由低筒變中筒,並且破天荒將Nike Skin與Flyknit仲有Flywire共冶一爐,打造出球感超強嘅新鞋面,相信好多球迷對住佢都會心心眼,好想試吧!無奈嘅係,由於香港「土地不足」,大家踢草場嘅機會,遠比街場為少,上次介紹嘅Hypervenom Phantom II FG有幾巴閉都好,都只係為真草場地而設,唔通街場之友就唔可以尼馬上身?Don't Worry,Nike Football今期大力推動全天候路線,加推咗專為小型球賽而設嘅HypervenomⅩ,唔只街場版,就連人造草版本都有齊,令各位好波之人可以喺任何場地都如虎添翼。

Nike HypervenomX Proximo II Street $1,299

Nike HypervenomX Proximo II $1,299

同樣追求抓地性,但係因應唔同環境,兩款HypervenomX嘅外底設計有明顯分別。專為街場或室內場而設嘅Proximo II Street(右),就以平底為主加上六角形坑紋;人造草版本嘅Proximo II(左)改為細小嘅矮釘,可以有效抓實草面。

與真草版嘅FG版本一樣,HypervenomX都有以Flyknit製成嘅Dynamic Fit中筒鞋領。

Nike Skin鞋面又輕又貼腳之餘,內藏反應度高嘅網狀夾層,控球時發揮一定程度嘅卸力效果。

鞋頭上嘅坑紋針對控球需要而設,可以提高與足球表面嘅摩擦效果。

鞋身兩側都有Flywire,撐起腳掌以防喺鞋籠內出現過度滑移。

剔牌新增嘅Nike FootballX系列,專為小型球賽而設,顧名思義,「X」就係羅馬數字嘅「10」,正係5 V 5小型球賽之中雙方球員嘅合共人數,呢個新系列保留原來草場波Boot嘅高規格性能設計之餘,換埋適合硬地場(包括街場及室內場)及人造草場嘅鞋底。

鞋底針對性部署

繼MagistaX及MercurialX之後,最近就有HypervenomX登場,硬地場版本換上平底之餘,六角形嘅坑紋有助分散壓力及提升全方位嘅轉向能力,所用物料Nike Grind橡膠耐磨之餘,仲係由回收物料製成,兼顧環保考慮;踢硬地場唔同真草場,腳掌所受嘅壓力大得多,故此無論係街場或人造草版本嘅HypervenomX,中底都用咗具有吸震能力嘅Phylon,算唔話得啦!

FG精華統統落齊

以往嘅街場Boot往往徒具虛形,個Look同草場Boot有七、八成似,但係後者嘅功能設計往往唔見影,X系列就形神俱在,正如FG版本,Hypervenom X嘅鞋身表面用咗Nike Skin,而內裡與Dynamic Fit中筒鞋領就由Flyknit織成。Nike Skin唔只夠輕夠貼腳,而且設計團隊深入研究過控球時鞋面出現嘅曲摺變化,喺鞋身前半段留下特製坑紋,帶出更準確、實在嘅控球效果。至於Flyknit選材彈性高,貼腳之餘又夠輕夠薄,但係會否支撐不足?當你見到鞋身兩側嘅Flywire,疑慮自會一掃而空,Flywire會隨住步伐變化而自動調節鬆緊度,無論任何動作都可將腳掌鎖緊喺鞋籠之內,減低腳掌喺鞋籠內出現過分滑移引至扭傷嘅機會,如此說來,鍾意扭波嘅街場之友,着住HypervenomX就可更加肆無忌憚啦!

查詢:2388 3348(旺角花園街66-68號地下Nike Football)

文︰Dick

攝︰Homan