老而彌堅　HT 1/6 T5 T-800

討厭政治者，搞一日都嫌多，自從2003年嘅《Terminator 3：Rise of the Machines》之後，阿諾舒華辛力加（Arnold Schwarzenegger）去咗做加州州長，之後無論係2009年嘅《Terminator Salvation》，或者一套又一套嘅Terminator系列電視劇，冇咗阿諾呢個Icon，當堂失色晒，玩具市場就係明證，喺呢段時間，出得最多又最好賣嘅，始終都係由阿諾飾演，喺T1、T2、T3擔正嘅T-800。等足12年，如今阿諾無官一身輕，強勢重返《Terminator》，唔只影迷開心，玩具迷以至Figure生產商亦都守得雲開，終於可以推出全新造型嘅阿諾T-800 Figure，唔使再將T2嘅阿諾當做千年油無限翻兜。

正如阿諾喺T5嘅招牌對白︰老而不廢（I’m old, but not obsolete），面容雖老，但身形依然健碩，HT嘅新版T-800就用咗專屬素體，唔只胸肌賁張，而且高約32cm，比一般1/6素體高咗2至3cm。

歲月痕迹仔細喺頭雕上重現，最難得係表情神態都變得溫柔咗，成個Look變得更加入戲。

黑超係阿諾版T-800嘅標誌，新版Figure當然唔少得，而且正常版及戰損版嘅頭雕都用得。

皮褸跟足Matchless London嘅實物設計而成，質感更加傳神。

隨盒附件唔多，就連造型手掌都只有六款，中規中矩囉。

T5嘅T-800唔着皮褲，改着Army Pant，HT版本自然要「二仔底」死跟。

相對於T2爆頭又爆眼嘅戰損Look，新版T-800嘅傷痕明顯細得多，不過喺傷口塗裝以至機械紋理，依然逼真還原。

受電影劇情所限，今次嘅T-800就只有霰彈槍一款武器。

無可否認，歲月催人老，過埋今個月30日，阿諾就60有8了，其實睇番一連三集嘅《The Expendables》，以及2013年嘅《The Last Line》，都明顯睇得出阿諾面上嘅歲月痕迹，以影迷角度嚟講，或者會覺得唏噓，但係從Figure角度而言，未嘗唔係一件好事，因為頭雕輪廓必然有明顯變化。

心情起伏　活現面上

今次Hot Toys最新發表嘅《Terminator Genisys》（簡稱T5）T-800，就由王牌組合Jong Hyuk Park及JC. Hong分別負責頭雕嘅雕工與塗裝，T5中嘅阿諾，唔只頭髮長咗、皮膚粗糙咗，連皺紋、魚尾紋、法令紋都現晒出嚟，面皮亦都難免鬆弛，種種老態都見於新頭雕上，更加抵讚嘅係T5嘅阿諾喺角色上已有明顯變化，既唔係T1中嘅殺手，亦唔只係T2及T3中嘅保鏢，而係變成Sarah Connor嘅慈父，Sarah唔只用「Pops」（老爸）嚟稱呼佢，阿諾仲有呢句對白︰「冇人可以傷害我嘅Sarah」，故此T5中嘅阿諾表情，冇咗以前嘅殺氣騰騰，眼神多咗一份慈愛，緊鎖嘅眉頭就傳神地表現佢非常擔心，似足一位父親睇住愛女亭亭玉立時嗰種嘅欣慰又擔心嘅心態，將新版T-800就形神並重還原出嚟，但願HT可以盡快推出埋由Emilia Clarke飾演嘅新版Sarah Connor，令呢對父女可以喺Figure界重聚。

皮褸出處　大有來頭

雖然T5中嘅阿諾唔似以前畀人打到甩皮甩骨，極其量只係打斷手，塊面亦只係右邊額角及面頰有明顯損傷，唔似T2咁款爆頭又爆眼，不過今次嘅1/6 T-800依然做埋戰損版頭雕，表情以正常版為基礎，再喺相關位置加上血漬及機械結構，論造工，HT喺之前嘅T-800作品中已經贏盡掌聲，今次自然亦冇甩拖，不過就當筆者貪心，阿諾喺T5中嘅生硬笑容係一個引起全場爆笑嘅Gimmick，如果新版T-800有埋呢款頭雕就Perfect了。至於配件方面實在係少，事關T5嘅阿諾大部分時間都只係一支霰彈槍上陣，唔似T2及T3咁多武器，不過貴精不貴多，原來仿皮褸大有文章，係HT同Matchless London合作，攞到呢間英國百年電單車服裝品牌嘅「拉臣」製作而成，喺後者嘅齊全資料Back Up下，唔怪得喺質感、剪裁及貼身程度上都無懈可擊。除咗T-800，HT講明仲會有T5嘅Endoskeleton，不過會唔會出埋Sarah Connor、John Connor及Kyle Reese，截稿時依然好口密，以上角色唔只深入民心，喺T5中亦都換晒新演員飾演，HT唔係唔出啩？