近年嚟，台灣成為香港人趨之若鶩嘅好地方，唔只有全民投票、有美眉、有雞排（妹）及洪瑞珍三明治，仲有賽車！本年度嘅Audi LMS Cup已經喺三月開鑼，而最近一站就喺台灣高雄大鵬灣國際賽車場舉行，亦係大會首次喺台灣開賽，並且首次喺一個賽站跑足三場賽事，至於最新嘅積分榜形勢，就由來自印度車手阿迪亞．帕特爾（Aditya Patel）領先。依家連台灣都有Audi LMS Cup，又再令香港人，尤其是車迷更加葡萄吧！

首次喺台灣舉行嘅Audi R8 LMS Cup，當地觀眾嘅熱情程度遠超預期。

李英健稱車廂溫度高達50度，出賽前要不停飲水降溫。

程叢夫喺第二回合取勝後，賽例規定喺第三回合車身就要加磅。

奧迪運動（亞洲）Customer Racing部門總監康博睿（Rene Koneberg，左二），率領三位參加咗五月德國紐布寧24小時耐力賽嘅車手，分別有Alex Yoong（左一）、程叢夫（右二）及李英健（右一）會見傳媒。

台灣車迷非常熱情，其中一位專誠走到賽車維修區，野生捕獲莫他拿（左）合照。

由於天氣炎熱，工作人員不停為輪胎量度溫度，真係辛苦晒！

台灣美眉真係名不虛傳，令賽事更添氣氛。

莫他拿駕駛48號戰車取得頭場冠軍，可惜喺次回合雖然首先衝線，但因犯規而被追加30秒，喺台灣站嘅經歷有如坐過山車。

嚟到第四個年度嘅Audi R8 LMS Cup，喺亞洲區已經建立起高知名度，主辦當局亦不斷注入新元素，務求令賽事保持新鮮感，例如去年加入日本站後，今年更加入台灣高雄大鵬灣國際賽車場一站。呢個賽車場啟用咗有四年多，佔地近30公頃，賽道全長3.5km，當中有16個彎位，以順時針方向行車，據官方資料顯示，大鵬灣國際賽車場係台灣唯一達到G2級別嘅賽車場，即係除咗F1，其餘FIA各項賽事都可以喺度舉行。喺今次Audi LMS Cup舉行之前，筆者跟唔少台灣傳媒「索料」，知道呢條賽道相當有「性格」，由於大部分路段都非常狹窄，加上直路只有700m左右，想爬頭，真係難上加難。

首度連戰三回合

台灣站嘅另一特點，就係一次過舉行三回合賽事，有別於平常嘅兩回合，原因係今年珠海首站賽事舉行期間，賽道路面狀況欠佳，大會為安全起見取消賽事，所以喺台灣站補番一個回合，事實上，台灣唔只盛產美食、美眉，當地嘅汽車文化亦相當興盛，別具個性嘅改裝車款隨處可見。台灣站嘅首場賽事於7月4日舉行，多達4,000名車迷塞爆觀眾席及賽道，當時天氣已達酷熱級別，室外氣溫高達34℃，香港車手李英健更稱置身車廂時，溫度飆升到50℃，不過都無阻賽事進行，首先以第五回合作序幕，多達20輛戰車喺賽道競逐，而首次赴台出賽嘅意大利車手莫他拿（Mortara）駕駛48號車一騎領先，呢位超班車手由頭帶到尾，以無敵姿態衝過終點，而第二及第三名得主分別係中國車手程叢夫，以及丹麥車手Thomas。

印度車手暫佔鰲頭

至於第六及第七回合就喺7月5日舉行，經過了首場賽事Run in後，大部分車手都放膽起嚟，非常進取搶位，所以出現唔少驚險場面，第六回合就更具戲劇性，莫他拿起步後一直領先，但係臨過終點先犯咗賽例，所以被加30秒，自然同獎項無緣，結果呢個回合由程叢夫奪冠，而第二、三名分別係阿迪亞．帕特爾及馬來西亞車手熊龍（Alex Yoong）；去到第七回合，大家搏得更盡，最後由Thomas首先衝線，第二、三名分別由Alex Yoong及程叢夫奪得。經過咗呢三個回合賽事，目前積分榜頭位由阿迪亞．帕特爾佔據。下站賽事將於八月喺馬來西亞舉行，現時位列第七嘅李英健，能否喺大馬爭取到更高排名？車迷拭目以待。

特派記者：Samuel

鳴謝：Audi HK