王敏德激玩Jeep新樂園

對於越野四驅迷嚟講，有乜好過放假揸住愛驅翻山越嶺Off-road任縱橫？無奈喺香港呢個石屎森林，又有邊度可以玩越野？近日Jeep喺上水開設咗全亞洲首個Jeep Adventure Zone越野駕駛體驗樂園，日前仲邀請埋四驅專家馬大立、星級越野車迷王敏德（Michael），以及一班Jeep車主率先試玩。

通過大型搖搖板，需要喺上面停車平衡五秒先可以繼續前行。

通過木橋時，參加者需要小心駕駛之餘，仲要靠拍檔喺車外幫手睇位。

Michael駕駛Wrangler Rubicon，瀟灑完成連串模擬路障挑戰，人車功架盡顯現。

單邊斜坡斜度約35度，行車時若果碰到旁邊嘅雪糕筒，會被罰加五秒時間。

Michael之後改揸Grand Cherokee Summit，此車備有Quadra-Trac II四驅系統，結合Selec-Terrain System，上落泥路So Easy。

Jeep Adventure Zone依山而建，有齊天然與人工障礙。

面對兩呎深嘅凹陷坑洞，Wrangler Unlimited Sahara依然可以照過無誤。

Wrangler Unlimited Rubicon搭載咗精良嘅4:1 Rock-Trac Part-Time四驅系統，可以從操控桿選擇2H、4H或4L等驅動模式。

越野四驅專家馬大立，喺活動開始前向大家介紹Jeep越野駕駛樂園嘅唔同設施、路況環境及駕駛注意事項。

游走碎石與溪澗路段，對Wrangler Unlimited Rubicon而言毫無難度。

Jeep Adventure Zone唔只設計咗唔同特色嘅Off-road環境，當中包括泥濘路段及人工模擬路障區，仲有多款Jeep型號，包括Wrangler、Grand Cherokee及Cherokee可供試玩。樂園開幕首月專門畀Jeep車主試玩，至於普羅車迷最快可以由8月9日（周日）起進場體驗，每位入場費$2,500，Jeep車主可享一次免費入場。

星級車迷限時完成

Michael一場嚟到，當然要落場試玩，同佢拍檔嘅係Jeep越野車王Wrangler Rubicon，在模擬路障區表現瀟灑利落，未有撞到任何一個雪糕筒，又冇反車，過橋表現亦相當平穩，完成時間啱啱好只係兩分鐘，連一向好少讚人嘅馬Sir，都讚Michael喺操控與時間掌握上都做得相當好。之後Michael改揸Grand Cherokee Summit，先後駛過唔同深度嘅凹陷坑洞、斜達65度嘅落斜泥路，仲有碎石與溪澗路段等Off-road環境，結果統統都順利過關，又畀機會Michael Show Quali。

多元化高難度障礙

至於場內布置方面，先講模擬路障區，主要由35度嘅單邊斜坡、大型搖搖板、單雙木橋等多組裝置組成，試玩當日參加者需要喺兩分鐘內駛過以上路障，為咗增加刺激性，單邊斜坡旁邊仲擺埋雪糕筒，每碰到一個，就會加時5秒，而且位置太高，就有反車風險，難度之高可想而知。之後去到大型搖搖板環節，參加者需要在此停車平衡五秒，先可以繼續前行，成功嘅話可以喺總時間上減20秒。最後到單雙獨木橋，一邊橋面只有由兩條樹幹拍埋一齊咁粗，另一邊仲窄到只有輪胎咁闊，想過關，就要靠拍檔喺車外幫手睇位畀提示，否則好易臨尾香。

除此之外，場內仲有一段兩公里長，專為Wrangler而設嘅紅色高難度越野路線，加上活動之前連續幾日都落雨，路面變得極為濕滑，自問冇本事嘅筆者都係選擇做乘客，坐喺馬Sir隔籬，由佢駕駛Wrangler Unlimited Sahara作示範，沿途駛過近兩呎深嘅凹陷坑洞、一段緊接90度彎角兼逾30m長嘅落斜路，旁邊又有懸崖、斜坡及濠溝等，乘坐感受顛簸難免，但係喺崎嶇荒野之中爬上爬落，無論爬坡、落斜、過坑及涉水，統統輕鬆跨過，除咗見到馬Sir嘅真功夫外，Wrangler Unlimited Sahara嘅越野能力之高亦相輔相成。