要配得起旗艦跑車呢個稱號，性能自然要比對手更勝一籌，善於推出高性能車款嘅Alfa Romeo自然深明此道，啱啱抵港嘅4C就靠1.8L Turbo引擎，爆發240bhp馬力，車重仲輕到895kg，輕易換嚟4kg/bhp嘅馬力重量比，性能直逼超級跑車！箇中奧妙就係以碳纖製成嘅Monocoque單體式車架，淨重只有65kg左右，比英國某款超跑輕約10kg！

Alfa Romeo 4C

前後輪圈標準尺碼分別為17吋及18吋，前輪內藏火紅色Brembo制動卡鉗。

為咗與輕量化「接軌」，就連頭燈嘅燈座都用碳纖製成。

鴨尾形車體結合尾泵把整流器，有效改善高速時嘅氣流作用。

配置咗Turbo嘅1.8L直四引擎，240bhp馬力絕對交足貨。

Monocoque單體式車架以碳纖製成，打開車門就會見到碳纖蹤影。

波檔與D.N.A.駕駛模式選擇鍵，統統置於中控台底部。

為咗加強車廂嘅戰鬥氣氛，軚環選用賽車專用嘅D字形皮革款式。

以高清TFT屏幕組成嘅儀錶板，提供詳盡而清晰嘅行車資訊。

助手席前面鑲有Alfa Romeo 4C字樣嘅金屬飾片，氣派盡現。

行李箱設於引擎後方，只係夠放兩至三件輕便行李。

皮革跑化桶椅符合人體工學設計，承托力高，頭枕就以紅線繡上廠徽。

車重只有895kg之餘，而且前後車重比例去到40:60，有助提升操控。

喺接近18年嘅試車生涯中，筆者真係試過唔少跑車，不過要數近期印象最深刻嘅，唔係林寶堅尼（Lamborghini）、法拉利（Ferrari）等大馬力豪門，而係引擎容積只有1,742c.c.嘅4C。雖然馬力只係240bhp，與主流超跑嘅500bhp、600bhp馬力有好大距離，但係4C嘅車重只有895kg，比起日系1.3L揭背車仔仲要輕，而且峰值扭力35.7kgm早於2,100rpm已經全數到位，並且可以一直Hold到3,750rpm，配合六前速Alfa TCT雙離合器自動波，0-100km/h只需4.5秒，加速表現貼近超跑水平。而減磅奧妙在於用料與別不同，全新開發嘅SMC（Sheet Moulding Compund）係一種高阻力、低密度嘅複合物料，令完成後嘅車體重量比鋼製成品輕約20%，但整體剛性依然維持高水平，就連車窗都減埋一份，不但厚度比尋常車款嘅玻璃少約10%，就連車頭擋風玻璃亦只厚4mm，有助將整體車重再向下調整約15%。而且剔除埋好多非必要組件，由此練成減磅神功。

TCT反應超快

減磅神功只係4C嘅武功秘笈上半部分，下冊就係1.8L直四引擎，透過新款燃油直接噴注系統及Turbo渦輪增壓器，令最大馬力達至240bhp，而且有效減少Turbo Lag嘅出現機會，加速更快更順暢。筆者喺清水灣與大坳門之間嘅山路試車，親身感受到以雙離合器為基礎嘅六前速Alfa TCT波箱表現出色，每當利用軚環撥片轉波，波箱即刻有回應，令駕駛者可以準確拿捏引擎轉速，輕易將引擎潛能徹底發揮。

車尾大奏交響樂

至於40:60嘅前後車重比例，與只有895kg嘅車體堪稱完美結合，即使轉向系統未有加設動力輔助設計，仍可輕鬆馳騁於連綿彎道之間。令人着迷嘅，仲有從座椅背後傳嚟嘅引擎與排氣聲，兩者唔只會跟隨引擎轉速高低而變奏，甚至係一種催化劑，催促筆者加大油門施壓力度，同時加密撥動軚環撥片嘅次數，動力就如江河決堤源源湧出，辣味之濃就如麻辣火鍋，令人愈食（踩）愈上癮！

SPEC

車型：雙門雙座位跑車

引擎：直四Turbo

容積：1,742c.c.

最大馬力：240bhp/6,000rpm

最大扭力：35.7kgm/2,100-3,750rpm

驅動：中置引擎、後輪驅動

傳動：六前速Alfa TCT雙離合器自動波附加減波

懸掛：（前）雙搖臂 （後）麥花臣

制動：（前/後）通風碟

輪胎：（前）205/45 R17 （後）235/40 R18

極速：258km/h

0-100km/h：4.5秒

車身體積：3,989×1,183×1,864mm（長×闊×高）

售價：$1,098,000起

查　　詢：2960 9288（太古汽車）

文：Dennis

攝：Paul