玩具節預告　野生捕獲合金紅Van

那夜凌晨，我坐上了旺角開往大埔的紅Van，點知坐到一半，我先發覺上錯車，我唔係想去大埔搵陳果，追問佢《紅Van2》幾時先上呀，而係想去九龍灣買TOMICA嘅紅Van至真！事關喺下個星期五嘅「香港玩具節」（HK Toy Festival 2015），TOMICA將會舉辦本地首個「香港TOMICA車展」之餘，仲會發表充滿本土特色嘅TOMICA小巴車仔，唔只紅Van，連綠Van都有，自問係車仔收藏家嘅你我他點可以錯過？司機，九龍灣有落，唔該！

陳果嘅《紅Van2》幾時先上？我真係唔知，我只知去香港玩具節登記做T Club會員，就有機會帶部TOMICA紅Van返屋企囉！

除咗紅Van，TOMICA就連綠Van都做埋，同樣像真度高。

紅、綠小巴各有唔同嘅車身貼紙，唔儲齊點安樂！

唔只車仔，TOMICA仲會展出旗下嘅星戰合金產品。

Sailor Moon S Action Series Art Statue 001嘅Sailor Moon，將於「精品」攤位內率先全球開售。

四驅車熱潮回歸，大會特意安排「超級四驅車比賽」，邀請咗箇中高手即場鬥車。

場內將會展出逾30個由1959至69年間生產嘅古典Barbie公仔，款款珍藏有今生無來世，好此道者記住入場睇番夠本。

首屆TOMICA本地車展

老老實實，所謂玩具展、動漫展之類嘅Event，每年都有唔少，香港玩具節又有咩Gimmick先？首先，作為TOMICA車仔嘅忠粉，今次真係非去不可，因為大會預告將會舉辦全港首屆嘅香港TOMICA車展，得到日本TAKARA TOMY官方協助，將有多款由1970至2000年期間推出、別具代表性嘅TOMICA車仔，會由日本運抵會場展出；除此之外，同場仲有全港最大型、面積達到10m × 2m嘅TOMICA及PLARAIL情景模型，成個車城砌出嚟之餘，仲會首次加入TOMICA System系列，整個情景唔只平面，仲會向高空發展，認真大陣仗。

頭號Target紅綠雙Van

至於全場嘅頭號Target，非TOMICA香港小巴莫屬，有齊紅、綠兩款車，造型似足實物之餘，仲會跟埋由TAKARA TOMY官方認可，只限香港玩具節先有嘅車身貼紙，而且紅Van、綠Van嘅貼紙款式各有不同，唔儲齊兩部都幾難瞓得着。參觀者只需前往T Club會員招募處，填妥登記表格成為T Club會員（入會費$60），就可獲贈限定版嘅紅Van或綠Van其中一部，即時再加$60，就可換購另一款會場限定版嘅香港小巴，不過有言在先，數量有限，都係奉勸各位爸打早買早享受。

除咗TOMICA大陣仗開Show，場內仲有好多精彩Gimmick，四驅車熱潮回歸，大會就安排咗「超級四驅車比賽」，仲有玩具迷等咗好耐，由Legend Studio Limited推出嘅Sailor Moon，就會於場內全球率先開售，玩具迷入場前，記住預備多啲銀彈了！