故事充滿警世意義，而且產品設計創意與誠意並重嘅《Acid Rain》，繼公鹿小隊（Bucks Team）嘅多款士兵Figure之後，最新作品終於玩番大型機械類別，不過唔係Raptor Speed MK.I、Speed MK.II或者Stronghold等變形款式，今次嘅Laurel改玩裝甲服路線，有新意之餘，全身仲有多個落足心思嘅Detail位，老實講，驚喜度比起同樣係裝甲服類別，但係已經出到濫嘅Iron Man Hulkbuster大得多。

《Acid Rain》
Laurel（303 Marine）
建議零售價︰$698

頭盔可以拆除之餘，正面嘅觀測器又可揭起，得出三款面相造型。

由雕工、塗裝到可動性，Laurel機師都無懈可擊，如果有支手槍傍身就完美了。

盒面Boxart出自原作者劉斯傑手筆，盒內仲有一張內容相同嘅小型海報。

打開駕駛艙時，機身背後嘅散熱槽亦會連動向外凸出。

手提式重炮需要雙手把持，炮身上面嘅握柄可以水平轉動，以便擺出唔同角度嘅發射甫士。

整個《Acid Rain》系列採用1/18比例，Laurel高約7.5吋，而肩掛式火箭炮既可水平轉動及上下擺動，亦可向下收起。

駕駛艙內每個細節都製作得一絲不苟，留意坐墊仲係軟膠製成，着意提升質感。

Laurel係《Acid Rain》嘅首個裝甲服設計，同Hulkbuster相比，整體造型傾向原始風，與同樣軍事化路線嘅《裝甲騎兵》，以及模型大師橫山宏嘅《Ma.K》接近得多，而且Laurel細致度更高，亦都更加「入世」。《Acid Rain》嘅世界觀好廣闊，兵種跟足現實環境，有海陸空以及海軍陸戰隊（Marine）之分，首款Laurel便髹上淺綠色及卡其色，屬於海軍陸戰隊類別，至於兩邊膊頭以及心口上嘅標誌，說明呢款Laurel隸屬於303部隊；除咗Laurel Marine主體，Boxset仲有手提式重炮及肩掛式火箭炮，以及一名機師Figure。秉承《Acid Rain》系列一向嘅「重手」風格，由Laurel到駕駛員都做足舊化塗裝，尤其是Laurel全身布滿銹迹、油污。顧名思義，《Acid Rain》嘅世界飽受酸雨之苦，故此Laurel身上最易沾到雨水嘅地方，例如機身上半段嘅弧位，以及卡其色嘅駕駛艙正面裝甲等位置，「生銹」程度更加嚴重，創作單位嘅投入程度可見一斑。

至Raw造型　更有代入感

雖然Laurel嘅賣相相當笨重，上重下輕、手長腳短，不過關節設計就有好大嘅可動性，例如手肘就有雙關節，而膊頭、手腕、腰位及髖關節都用咗Ball Joint，而且每個關節都相當實淨，夠力Hold到甫士，尤其是考慮到手提式重炮噸位唔細，故此最受力嘅膊頭用咗雙關節，與上肢連接嗰邊用咗Ball Joint，另一面就用齒輪與手臂相連，夠力擺出雙手持炮嘅甫士。美中不足係受上重下輕嘅造型所限，若果上肢大幅度向前傾嘅話，就會影響接地性，若然日後加推陸軍（Army）版或其他部隊版本，而雙腿可以加入合金物料嘅話，相信有助解決問題。

細節多多　樣樣交足貨

Laurel係一款大型裝甲服，機頂及機身正面分別向上下打開，就可將隨盒附上嘅機師放入駕駛艙，留意打開機身正面裝甲時，機身背部嘅散熱槽就會連動向外凸出，有Gimmick之餘仲有道理，事關根據原裝機設，當Laurel處於待機狀態時，將散熱槽向外凸出可以加快散熱效果，藉此縮短整備時間。至於駕駛艙就與機身表面一樣，有高水準嘅雕功及塗裝，喉管、把手統統有齊，坐墊更加用上軟膠製成，質感冇得輸，還要留意駕駛艙嘅左上方暗藏一個文件夾，可以夾上與Laurel相同比例（1/18）嘅地圖與作戰文件，更加入戲。至於機師Figure同樣係精心製作，尤其是頭盔可以拆除之餘，頭盔正面嘅觀測器又可揭起，換言之可以做出三款面相造型，而且與尺寸相若嘅美式3.75吋Figure相比，《Acid Rain》嘅士兵Figure就有更多嘅可動關節，活動幅度亦更大，不過請恕筆者奄尖，Laruel嘅機師並冇個人武器跟身，現實中嘅坦克兵或者戰鬥機機師，都有手槍傍身喎。

網　址︰www.acidrainworld.blogspot.com、www.oritoy.com、skronex.com

銷售點︰Ant Toy（旺角煙廠街31號2F）

文︰Dick　攝︰Bowie