最慳家歐洲車　smart fortwo coupe pulse

偏好歐洲車仔，平時載客又係一個起、兩個止（包埋駕駛者自己喎），唔只車價，就連油費都想慳得就慳嘅話，能夠滿足晒以上奄尖要求嘅選擇並唔多，似乎唯獨smart fortwo先做到面面俱圓，更何況最近推出嘅smart fortwo coupe pulse車價又作下調，標價只係$123,500發售，比之前下調咗接近20%，喜歡細車仔的，睇怕會即時「心心眼」！

車身細細，車尾依然有220L置物量，相信已有交代啦！

以雙座位車款嚟講，smart fortwo嘅車廂空間都算OK。

車廂布局簡約，ECO駕駛按鍵、波棍與撻車匙都喺晒附近位置。

打開天窗遮光板後，車廂開揚度即時大增。

三幅式軚環設計工整，中間縫有smart廠徽點綴。

車價低、油費又平，smart fortwo coupe pulse可謂最易「上車」嘅歐洲型號。

油費低至$0.7/km

先不論計性價比如何，筆者已經覺得smart fortwo好適合香港使用，皆因香港路面車多又路窄，泊位就更有難度，當你去過銅鑼灣嘅上樓停車場泊車，自會心有同感。smart fortwo coupe pulse嘅車身長度只有2,695mm，比一般四門房車短得多，置身駕駛席，望左望右幾乎都沒有盲點，泊車Easy得多。除此之外，喺香港出車，耗油表現不能忽略，以ECO駕駛模式計算下，smart fortwo coupe pulse，廠方公布嘅平均耗油量只有4.3L/100km，按目前油價計算，油費只係$0.7/km，夠晒慳家。

慳油之餘，smart fortwo coupe pulse仍有唔錯嘅性能表現，1.0L直三引擎嘅馬力與扭力分別達71hp及9.4kgm，配合五前速自動波箱及後驅布局，起步有頗明顯嘅推背力，對新牌人士嚟講會覺得不習慣，其實只要跟油門溝通得好啲，花多少少時間相處，默契自然來。

內外年輕化布局

揭背車仔特別受年輕人歡迎，更何況smart fortwo coupe pulse嘅造型別樹一幟，純白車身加上門側嘅紅色間紋，對比分明，頭燈組底部又有一字形嘅日間行車燈，追上現時嘅車壇潮流。車廂方面，雙座位係smart fortwo嘅一向標誌，打開大天幕遮光板後，開揚度自然大增。過往唔少人認為smart fortwo嘅置物量不足，不過它擺明車馬係小車代表，唔通奢望可以放到部單車嗎？其實smart fortwo嘅車尾都有接近220L嘅置物量，足夠放入Shopping過後嘅四、五袋戰利品，仲唔算有交代？